නාවික භටයන් හය දෙනකු සහ නේපාල සහන සේවකයන් දෙදෙනකු සමග අතුරුදන්ව තිබූ ඇමෙරිකානු හෙලිකොප්ටරයේ කොටස් හමුවූ බව ඇමෙරිකානු ආරක්ෂක බලධාරීන් එය ස්ථිර කළේය.

නේපාලයේ සහන සේවාවල නිරතව සිටින ඇමෙරිකානු බලඝනයේ අණ දෙන නිලධාරි නාවික ලුතිනන් ජෙනරාල් ජෝන් විල්සර් පවසන්නේ මේ අනතුරින් කිසිවකු ජීවතුන් අතර සිටිතැයි විශ්වාසයක් නැති බවයි. නේපාල ආරක්ෂක ලේකම් ෂ්වොරි පවුඩ්යාල් පැවසුවේ ගිනිගත් හෙලිකොප්ටරෙයේ සැකිල්ල සමග තිදෙනකුගේ සිරුරු හමුවී ඇති බවයි. අයහපත් කාලගුණය හේතුවෙන් දැනට පිරික්සුම් කටයුතු තාවකාලිකව නතර කර ඇති බවයි. මේ හේතුවෙන් නේපාලයේ ඇමරිකානු නාවික බලඝනය විසින් සිදුකරණ මෙහෙයුම් කටයුතුවලට තරමක බාධාවක් සිදුවන බව ද හෙතෙම පැවසීය.

ඇමරිකානු හෙලිකොප්ටරය අනතුරට පත්ව ඇත්තේ නේපාලයේ ගෝතාලි ප්‍රදේශයේ අඩි 11200 ක් එනම් මිටර් 3400ක් ඉහළ අහසේ ගමන් කරණ විටදී බව නේපාල බ්‍රිගේඩියර් ජනරාල් බිනෝජ් බස්නෙට් පැවසීය. අතුරුදන් යූඑච් - 1 හුවේ හෙලිකොප්ටරයේ  සැකිල්ල නේපාලයේ චැරිකොට් ප්‍රදේශයට සැතපුම් 8 ක් උතුරුදෙසින් වු කඳුකර පෙදෙසක තිබී හමුවු බව  ඇමරිකානු ඒකාබද්ධ කාර්යය බලකාය ද සනාථ කලේය. කෙසේ නමුත් මලසිරුරු හමුවු බවක් පිලිබඳ ඇමෙරිකාවේ බලධාරීන් කිසිවෙක් මෙතෙක් ප්‍රකාශ කර නැත.