2023 පෙබරවාරි මස 08 වන බදාදා
(ඉන්දිකා රාමනායක)
ජාතීන් අතර සහජීවනය හා සාමය ආරක්ෂා කිරීමට බාධාවන ආකාරයේ ක්‍රියා වැළැක්වීමට වහාම පියවර ගන්නා ලෙස පොලිස් මූලස්ථානය අද (25) ජ්‍යෙෂ්ඨ පොලිස් නිලධාරීන්ට නියෝගයක් නිකුක් කර ඇති බව පොලිස් මූලස්ථානය කියයි.
ජාතීන් අතර සහජීවනයට හා සාමයට බාධාවන ආකාරයේ සිදුවීම් වළක්වා ගැනීමට පොලිස් ජංගම සංචාර, යතුරුපැදි හා පාපැදි සංචාර කණ්ඩායම් යොදවා ක්‍රියා කළ යුතු බවට එම නිලධාරීන්ට උපදෙස් ලබා දී ඇති බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි රුවන් ගුණසේකර මහතා පැවසීය.
එවැනි ආකාරයේ පැමිණිල්ලක් ලැබුණු අවස්ථාවේදී අදාළ පොලිස් ස්ථානය භාර සහකාර පොලිස් අධිකාරීවරයා විසින් ඒ පිළිබඳ විමර්ශනය කර සිද්ධියට සම්බන්ධ සැකකරුවන් අත්අඩංගුවට ගෙන අධිකරණයට ඉදිරිපත් කළ යුතු බව රුවන් ගුණසේකර මහතා කියා සිටියේය.
පානදුර දකුණ ප‍්‍රදේශයේ මාර්ගයයක නමක් සඳහන් කරමින් භාෂා ති‍්‍රත්වයෙන් ප‍්‍රදර්ශනය කර තිබූ ප‍්‍රදර්ශන පුවරුවක් ගලවා එයට අනර්ථය සිදුකිරීමේ සිද්ධියක් පොලිසියට වාර්තා වී ඇති බවත් ඒ සම්බන්ධයෙන් පරීක්ෂණ පවත්වා සිද්ධියට අදාල සැකකරුවන් අත්අඩංගුවට ගෙන අධිකරණයට ඉදිරිපත් කරන ලෙසට පානදුර දකුණ පොලිසිය දැනුම් දී ඇති බවත් රුවන් ගුණසේකර මහතා වැඩිදුරටත් කියා සිටියේය.
