(එස්. ඩී. කොඩිකාර)

දෙනියාය, බෙරලපනාතර ප්‍රදේශයේ ඇඳුම් මසන්නකු එල්ල කළ කතුරු පහරින් තුවාල ලැබූ තරුණයකු අද(10) මියගොස් ඇතැයි ඌරුබොක්ක පොලිසිය කියයි.

මැසීමට දුන් ඇඳුමක් සම්බන්ධයෙන් එම සාප්පුවේ දී ඇති වූ  කතාබහක්  දුරදිග යාම හේතුවෙන් එල්ල කළ කතුරු පහරින් තුවාල ලැබූ තරුණයා බරපතල තුවාල ලබා  හීගොඩ රජයේ රෝහලට රැගෙන යනවිට මිය ගිය බව පොලිසිය පවසයි.

මියගොස් ඇත්තේ විලබඩ  හංදිය, කිරිවැල්දොල, දෙනියාය පදිංචි කසුන් ධනංජය නැමති 21 හැවිරිදි තරුණයෙකි.

සිද්ධිය සම්බන්ධයෙන් බෙරලපනාතර ප්‍රදේශයේ පදිංචි 46 හැවිරිදි සැකකාර ටේලර්වරයා අත්අඩංගුවට ගෙන ඇත.

සැකකරු මොරවක මහේස්ත්‍රාත් අධිකරණයට ඉදිරිපත් කිරීමට නියමිතය.

මියගිය තරුණයාගේ පශ්චාත් මරණ පරීක්ෂණය  හීගොඩ  රජයේ රෝහල දී පැවැත්වීමට නියමිතය.

සිද්ධිය සම්බන්ධයෙන් ඌරුබොක්ක පොලිසිය වැඩිදුර පරීක්ෂණ පවත්වයි.