(ඩයනා උදයංගනී)

ලොව ඉහළම නවීන සෞඛ්‍ය තාක්ෂණික පද්ධතියක් පවතින ජර්මනියේ ආයෝජකයන් ශ්‍රී ලංකාව තුළ සෞඛ්‍ය ක්ෂේත්‍රයේ ආයෝජන සඳහා දැඩි උනන්දුවක් දක්වන බව ජර්මානු තානාපති හොල්ගර් සෙවුබර්ට් මහතා සෞඛ්‍ය අමාත්‍ය කෙහෙලිය රඹුක්වැල්ල මහතා හමුවේ පැවසීය.

එවැනි ආයෝජකයන් මේ වන විටත් ඖෂධ නිෂ්පාදනය ඇතුළු මෙරට ආයෝජන සඳහා ක්‍රියාත්මකව ඇති බවත් එය තවදුරටත් පුළුල් වශයෙන් කෙරෙන්නේ නම් අතිශය වැදගත් බවත් තානාපතිවරයා සඳහන් කළේය.

ජර්මානු තානාපතිවරයා මේ බව පැවසුවේ සෞඛ්‍ය අමාත්‍ය කෙහෙලිය රඹුක්වැල්ල මහතා සමඟ එම අමාත්‍යාංශයේදී පැවති සාකච්ඡාවකදීය.

ශ්‍රී ලංකාව හා ජර්මනිය අතර රාජ්‍ය තාන්ත්‍රික සබඳතා සඳහා 2023 වසර වන විට වසර 70 ක් සපිරෙන බැවින් ඒ වෙනුවෙන් සෞඛ්‍ය ක්ෂේත්‍රය පදනම් කරගනිමින් පුළුල් ආයෝජන වැඩසටහන් මාලාවක් ක්‍රියාවට නැංවීම කාලෝචිත බව ඔහු පැවසීය.

සෞඛ්‍ය අමාත්‍ය කෙහෙලිය රඹුක්වැල්ල මහතා මෙහිදී පැවසුවේ ඉදිරි වසර කිහිපය තුළ රටට අවශ්‍ය ඖෂධවලින් විශාල ප්‍රමාණයක් රට තුළම නිෂ්පාදනය කිරීමට සැලැසුම් කර තිබෙන බවය.