(මනෝජ් හර්ෂික)
 
පාස්කු ඉරිදා ප්‍රහාරය සම්බන්ධයෙන් ශෝකය පළකරන බවද, ශ්‍රී ලංකා රජයට පූර්ණ සහය ලබාදෙන බවට සහතික වන බවද ශ්‍රී ලංකාවේ සංචාරයක නිරත වන එක්සත් ජාතීන්ගේ සංවිධානයේ නියෝජ්‍ය මහලේකම් මිගෙල් ඇන්හෙල් මොරටිනෝස් මහතා පවසයි.
 
එක්සත් ජාතීන්ගේ සංවිධානයේ නියෝජ්‍ය මහ ලේකම්වරයා අග්‍රාමාත්‍ය රනිල් වික්‍රමසිංහ මහතා හමුවී මේ බව පැවසීය.
 
ශ්‍රී ලංකාවට පැමිණ පෞද්ගලිකවම අග්‍රාමාත්‍යවරයා හමු වී ශ්‍රී ලංකා රජය වෙත සිය කනගාටුව පළකරන ලෙසද,  එක්සත් ජාතීන්ගේ සංවිධානය  ශ්‍රී ලංකා රජය ශක්තිමත් කිරීමට ඇප කැප වී සිටින බව දන්වන ලෙසද, එක්සත් ජාතීන්ගේ සංවිධානයේ මහලේකම්වරයා විසින් තමන් වෙත දන්වා සිටි බවද නියෝජ්‍ය මහලේකම්වරයා වැඩිදුරටත් සඳහන් කළේය.
 
මෙම දුෂ්කර අවස්ථාවේදී සමස්ත ජාත්‍යන්තර ප්‍රජාව ශ්‍රී ලංකාව සමඟ සිටින බවට එහිදී ඔහු අවධාරණය කළේය.