(විනීතා එම් ගමගේ)

කොළඹ වරායේ නැගෙනහිර පර්යන්තයේ මෙහෙයුම් කටයුතු ආරම්භ කිරීම වළකාලමින් බලපෑම් කරන විදේශ රාජ්‍යය කුමක්දැයි රටට හෙළි කරන ලෙස සමස්ත ලංකා වරාය පොදු සේවක සංගමය ජනාධිපති ගෝඨාභය රාජපක්ෂ මහතා වෙත ලිපියක් යවමින් ඉල්ලීමක් කර ඇත.

මේ වනවිට සවිකිරීම සඳහා ගෙන්වූ ග්‍රැන්ටි දොඹකර තුන පර්යන්ත ගත කිරීම ප්‍රමාද කරමින් තිබෙන බව පෙන්වා දෙන එම සංගමය වහා මෙම ප්‍රශ්නය සඳහා මැදිහත්වීමක් සිදුකරන්නැයි ද ජනාධිපතිවරයාගෙන් ඉල්ලා සිටියි.

එම ග්‍රැන්ටි දොඹකර මේ වනවතුරුත් පර්යන්ත ගත කරගත නොහැකි වීම නිසා ඉකුත් 20 වැනිදා සිට මේ දක්වා දිනපතා එක් දිනකට රුපියල් 90 ලක්ෂයකට ආසන්න මුදලක් බැගින් ප්‍රමාද ගාස්තු ගෙවීමට වරාය අධිකාරියට සිදුව ඇති බැවින් මෙකී ප්‍රශ්නයට වහා විසඳුමක් අවශ්‍යව ඇතැයි ද ඔවුන් දන්වා යවා ඇත.

ශ්‍රී ලංකා වරාය අධිකාරිය සතු ගැඹුරින් වැඩි විශාල නෞකා මෙහෙයවිය හැකි එකම පර්යන්තය පුද්ගලීකරණයට පිඹුරුපත් සකස් කෙරුණේ පසුගිය රජය සමයේ  බවත් මේ සම්බන්ධන්‍ මුල සිට තම සංගමය විරෝධය පළ කළ බවත් සමස්ත ලංකා වරාය පොදුසේවක සමිතියේ ප්‍රධාන ලේකම් චන්ද්‍රසිරි මහගමගේ මහතා පැවසීය.

මේ අතර වරායේ සේවක වෘත්තීය සමිති 23 ම එක්ව ඉදිරි ක්‍රියාමාර්ග පිළිබඳව සාකච්ඡා කරමින් සිටින බවත් වරාය අධිකාරිය යටතේ ඉදිරි පැය 48 දී නැගෙනහිර පර්යන්තය වැඩ ආරම්භ කළ යුතු බවත් වරායේ වෘත්තිය සමිති කියා සිටිති.

එසේ නොවුන හොත් වෘත්තීය ක්‍රියා මාර්ගයකට එළැඹීමට මේ වනවිට සියලු වෘත්තීය සමිති එකඟතාව පල කර ඇති බව වරාය ස්වාධීන වෘත්තීය සමිතියේ සභාපති ලාල් බංගමුවගේ මහතා පැවැසීය.

යම් විසදුමකට පැමිණීමට දින දෙකක් කල් දෙන ලෙස වරාය පාලනාධිකාරිය වෘත්තිය සමිතිවලින් ඉල්ලීමක් කර ඇති බැවින් තවමත් වෘත්තිය සමිති යම් ධනාත්මක විසඳුමක් බලාපොරොත්තුවෙන් සිටින බව පැවසූ බංගමුවගේ මහතා එසේ වුවත් කිසිදු විදේශ රටකට නැගෙනහිර පර්යන්තය පවරා දීමට වෘත්තිය සමිති ඉඩක් නොතබන බව ද සඳහන් කළේය.

නැගෙනහිර පර්යන්තයේ මෙහෙයුම් කටයුතු  වරාය අධිකාරිය යටතේ ආරම්භ කරන මෙන් ඉල්ලා වරායේ සේවකයෝ ඉකුත් වසර පහ තිස්සේ ම අරගල කරන බව ද ඔහු කියා සිටියේය.