පුෂ්පකුමාර මල්ලවආරච්චි
 
පලමුරේ කනිටු විදුහලේ දරුවන්ගේ මත් ද්‍රව්‍ය විරෝධි වැඩ සටහනකට සහභාගිවීමට ගිය වරකාපොළ පොලිසියේ ප්‍රජා පොලිස් ඒකකයේ උප පොලිස් පරීක්ෂකවරයකු  පිහි ඇණුමකට ලක්ව   තුවාල ලබා වරකාපොල මූලික රෝහලේ දැඩි සත්කාර ඒකකයට ඇතුලත් කර ඇතැයි වරකාපොළ පොලිසිය කියයි.
 
මෙසේ පිහි ඇනුමට ලක්ව ඇත්තේ මත් ද්‍රව්‍ය ආදිය සම්බන්ධයෙන් ජනතාව හා දරුවන් දැනුම්වත් කිරීමේ දේශකයකු වශයෙන් කටයුතු කරන උපාලි සමරසේකර නැමති උප පොලිස් පරීක්ෂකවරයෙකි. 
 
ජනාධිපතිවරයාගේ මත්ද්‍රව්‍ය වැලැක්වීමේ වැඩ සටහන යටතේ පලමුරේ විදුහලේ දරුවන්ගේ පෝස්ටර් හා බැනර් ප්‍රදර්ශන වැඩ සටහනක් අද  පැවැත්වීමට සංවිධානය කර තිබී ඇත. ඒ අනුව මෙම පාසල් දරු පිරිස මේ සදහා වරකාපොළ අගුරුවැල්ල මාර්ගයේ නියදුරුපොල රබර් කර්මාන්ත ශාලාව අසලට පැමිණ ඇති අවස්ථාවේ මෙම උප පොලිස් පරීක්ෂකවරයාද ඒ සදහා දායකවීම පිනිස ඒ ස්ථානයට ගොස් ඇති බව පොලිසිය කියයි.
 
පාසල් දරුවන්ගේ මත් ද්‍රව්‍ය වලට විරෝධතාවය දැක්වූ මෙම ස්ථානයට ඒ ආසන්නයේ කසිප්පු වෙළෙඳාමේ යෙදෙන පුද්ගලයකු යැයි සැක කරන්නකු කඩා වැදී උප පොලිස් පරීක්ෂකවරයාට   පිහියෙන් ඇන පලා ගොස් ඇතැයි පොලිසිය සඳහන් කරයි