( තිළිණි ද සිල්වා සහ රංජන් කටුගම්පොළ )

ඉදිරි පාර්ලිමේන්තු මැතිවරණය සඳහා ඉදිරිපත් වන අපේක්ෂකයන් සදහා මනාප අංක නිකුත් කිරීම ඇතුළු මහ මැතිවරණය පැවැත්වීමට අදාළ ඉදිරි පියවර ගැනීමෙන් මැතිවරණ කොමිසම සහ එහි සාමාජිකයන් වලක්වන අතුරු නියෝගයක් නිකුත් කරන ලෙස ඉල්ලා ශ්‍රේෂ්ඨාධිකරණය හමුවේ අද(14) මූලික අයිතිවාසිකම් පෙත්සමක් ගොනු කෙරිණි.
 
ප‍්‍රජාතන්ත‍්‍රවාදී එක්සත් ජාතික පෙරමුණේ මහලේකම් ආරියවංශ දිසානායක විසින් මෙම පෙත්සම ගොනු කරනු ලැබ ඇත.
 
මෙම පෙත්සමේ වගඋත්තරකරුවන් වශයෙන් මැතිවරණ කොමසාරිස් ජනරාල් සමන් ශ්‍රී රත්නායක, මැතිවරණ කොමිසමේ සභාපති සහ එහි සාමාජිකයන්, ජනාධිපති ලේකම් ආචාර්ය පී. බී ජයසුන්දර, සෞඛ්‍ය සේවා අධ්‍යක්ෂ ජනරාල් අනිල් ජාසිංහ සහ නීතිපති වරයා ඇතුළු නව දෙනෙක් නම් කරනු ලැබ සිටිති.
 
අවදානමකින් තොරව පාර්ලිමේන්තු මැතිවරණය පැවැත්වීමට තරම් කෝවිඞ් 19 වසංගතය පාලනය කර ඇතැයි සෑහීමකට පත් වෙන බවට සදහන් දිව්රුම් පෙත්සමක් මැතිවරණ කොමිසමේ සභාපති සහ එහි සාමාජිකයන්ට ලබා දෙන ලෙස සෞඛ්‍ය සේවා අධ්‍යක්ෂ ජනරාල් අනිල් ජාසිංහ මහතාට නියම කරන ලෙස ද මෙම පෙත්සම මගින් ඉල්ලා ඇත.
 
නීතීඥ මෝදිත ඒකනායක මහතා මාර්ගයෙන් මෙම පෙත්සම් ගොනු කර ඇත.
පෙත්සම්කරු සිය පෙත්සම මඟින් පෙන්වා දෙන්නේ පාර්ලිමේන්තුව ඉකුත් මාර්තු මස විසුරුවා හැරි බවත් මහමැතිවරණය අපේ‍්‍රල් මස 25 වැනිදා පැවැත්වීමට නියමිතව තිබූ බවත් ,ඒ සඳහා නාම යෝජනා බාර ගත් අතර තම නායකත්වයෙන් යුතු එම පක්ෂයෙන් නාම යෝජනා 138ක් ඉදිරිපත් කළ බවය.
 
එහෙත් කෝවිඞ් වසංගතය පැතිරී ඇති නිසා එදින මැතිවරණ පැවැත්වීමට නොහැකිවූ බවද පෙත්සම්කරු කියා සිටී.එවිටමැතිවරණ පැවැත්වීමට ආදාළව ශ්‍රේෂ්ඨාධිකරණයේ මතය විමසන ලෙස මැතිවරණ කොමිසමේ සභාපති මහින්ද දේශප‍්‍රිය මහතා ඉකුත් මාර්තු 31 වැනිදා ජනාධිපති ලේකම්වරයා ගෙන් ඉල්ලා සිටි අතර එවැනි මත විමසීමක් සිදු කිරීම අවශ්‍ය නොවන බව ජනාධිපති ලේකම්වරයා විසින් එම කොමිසමට දන්වා යැවූ බවද පෙත්සමෙහි සදහන් වේ. එමඟින් රටේ පැවති දේශපාලන තත්ත්වය ව්‍යාකූල වූ බවද පෙත්සම්කරු කියා සිටී.

ඒ අනුව මහමැතිවරණය ලබන ජූනි මස 20 වැනිදා පැවැත්වීමට මැතිවරණ කොමිසම විසින් තීරණය කළ බවද පෙත්සම්කරු කියා සිටී.
 
පාර්ලිමේන්තුව විසුරුවා හැරීමෙන් පසු මාස තුනක කාලයක් පමණක් ජනාධිපතිවරයාට රට පාලනය හැකි බව ආණ්ඩුක‍්‍රම ව්‍යස්ථාවේ 70(1)70(5)(ජ)32(3) යන ව්‍යවස්ථා වල සදහන් වන බව පෙත්සම්කරු කියා සිටී .ඒ අනුව එම කාල සීමාව ඉක්මවා පාර්ලිමේන්තුව රහිතව රට පාලනය කිරීමට ජනාධිපතිවරයාට බලයක් නැතැයි පෙත්සම්කරු කියා සිටී.
 
එසේම මෙවැනි තත්ත්වයක් හමුවේ කෝවිඞ් වසංගතය පැතිරී ඇති නිසා මැතිවරණ ප‍්‍රචාරක කටයුතු සඳහා ගෙයින් ගෙට යාමට අපේක්ෂකයන්ට නොහැකි අතර එය නිසි පරිදි මැතිවරණය පැවැත්වීමට බාධාවක් බවද සඳහන් කර තිබේ.
ඉහත කරුණු අනුව පාර්ලිමේන්තු ව නොකැදවීමෙන් සහ සහ වගඋත්තරකරුවන් පියවර ගැනීමෙන් හෝ නොගැනීම මගින් සිය මූලික අයිතිවාසිකම් උල්ලංඝණය වී ඇතැයි පෙත්සම් කරු පෙන්වා දී ඇත.
 
එබැවින් මෙම පෙත්සම විභාගයට ගන්නා ලෙසත් , පෙත්සම විභාගයට ගෙන අවසන් වන තෙක් ඉදිරි පාර්ලිමේන්තු මැතිවරණය සඳහා ඉදිරිපත් වන අපේක්ෂකයන් සදහා මනාප අංක නිකුත් කිරීම ඇතුළු මහමැතිවරණය පැවැත්වීමට අදාළ ඉදිරි පියවර ගැනීමෙන් මැතිවරණ කොමිසම සහ එහි සාමාජිකයන් වලක්වන අතුරු නියෝගයක් නිකුත් කරන ලෙසත් පෙත්සම්කරු සිය පෙත්සම මඟින් ඉල්ලා සිටී.
 
අවදානමකින් තොරව පාර්ලිමේන්තු මැතිවරණය පැවැත්වීමට තරම් කෝවිඞ් 19 වසංගතය පාලනය කර ඇතැයි සෑහීමකට පත් වෙන බවට සදහන් දිව්රුම් පෙත්සමක් මැතිවරණ කොමිසමේ සභාපති සහ එහි සාමාජිකයන්ට ලබා දෙන ලෙසද සෞඛ්‍ය සේවා අධ්‍යක්ෂ ජනරාල් අනිල් ජාසිංහ මහතාට නියම කරන ලෙසද මෙම පෙත්සම්කරු අධිකරණයෙන් ඉල්ලා සිටී.