(සිරංගිකා ලොකුකරවිට)

පළාත් සභා හා පළාත් පාලන ආයතනවල සේවය කරන රාජ්‍ය සේවකයන්ට මෙවර අලුත් අවුරුද්දට පෙර වැටුප් ගෙවීම ගැටලුවක් බවත් එයට වගකිව යුත්තේ පාර්ලිමේන්තුවේ දී අමාත්‍යාංශයේ වැය ශීර්ෂය පරාජයට පත්කළ පොහොට්ටුවේ මන්ත්‍රීවරුන් බවත් අභ්‍යන්තර හා ස්වදේශ කටයුතු සහ පළාත් සභා හා පළාත් පාලන අමාත්‍ය වජිර අබේවර්ධන මහතා අද (1) ගාල්ලේ දී පැවසීය.

අමාත්‍යවරයා මේ බව පැවසුවේ ගාල්ල කඩවත් සතර ප්‍රාදේශීය සම්බන්ධීකරණ කමිටුවට සහභාගී වෙමිනි.

කඩවත් සතර ප්‍රාදේශීය ලේකම් කාර්යාල ශ්‍රවණාගාරයේ දී මෙම රැස්වීම පැවැත්විණි.

එහිදී වැඩිදුරටත් අදහස් දැක්වූ අමාත්‍යවරයා මෙසේ ද කීවේය.

‘අමාත්‍යාංශයේ වැය ශීර්ෂය පරාජයට පත්වූ නිසා ආණ්ඩුවට ප්‍රශ්නයක් තියෙනවා කියලා ඇතැම් අය හිතාගෙන ඉන්නවා. අපිට නම් කිසිම ප්‍රශ්නයක් නෑ. ප්‍රශ්නය තියෙන්නේ පොහොට්ටුව බලය අල්ලාගෙන ඉන්න පළාත් පාලන ආයතනවලට සහ පළාත් සභාවලට. මේවායේ සේවය කරන රජයේ සේවකයන්ට අවුරුදු කන්න පඩි ගෙවන්න අවශ්‍යයි කියලා හිතන්නෙත් නැතිව පළාත් සභා හා පළාත් පාලන වැය ශීර්ෂය පරාජයට පත්කලා. මේකට වගකියන්න ඕනෑ විපක්ෂයයි"

'' අයවැය කාරක සභා අවස්ථාවේදී අභ්‍යන්තර හා ස්වදේශ කටයුතු සහ පළාත් සභා හා පළාත් පාලන අමාත්‍යාංශයේ වැය ශිර්ෂය සම්මත වූ අතර ආගමන විගමන දෙපාර්තමේන්තුව, පුද්ගලයන් ලියාපදිංචි කිරීමේ දෙපාර්තමේන්තුව, රෙජිස්ට්‍රාර් ජනරාල් දෙපාර්තමේන්තුව ඇතුළු දිස්ත්‍රික් ලේකම් කාර්යාල ගණනාවක ද වැය ශීර්ෂ සම්මත වෙමින් තිබුණ අවස්ථාවේදී හදිසියේ බෙදීමක් ඉල්ලා සිටියා.

නමුත් කලින් පැවැති පක්ෂ නායක රැස්වීමේ දී එකඟතාවකට පැමිණියා ඡන්දයක් නොපවත්වන බවට. මේ හදිසි බෙදීම ඉල්ලා සිටීම නිසා පැවැත්වූ ඡන්ද විමසීමෙන් වැය ශීර්ෂ පරාජයට පත්වුණා. ඒ  නිසා පළාත් 9 ක පළාත් පාලන ආයතන 341 ක අප්‍රේල් 5 වැනි දායින් පසු වැඩ අවසන් කර ඇති වැඩකටයුතු සහ වැඩ කෙරෙමින් පවතින වැඩවල අත්තිකාරම් මුදල් සහ කිසිදු මුදලක් ගොවීමට නොහැකි වෙනවා.  

මෙහි දී අමාත්‍යවරයා වැඩිදුරටත් පැවසුවේ ඉතිහාසයෙත් විවිධ අවස්ථාවල වැය ශීර්ෂ පරාජය කර ඇතත් එයින් ආණ්ඩුවලට හානියක් සිදු නොවූ බවයි. මෙවර එය බැරෑරුම් ප්‍රශ්නයක් වන්නේ වෙනදා අයවැය ඉදිරිපත් වන්නේ දෙසැම්බර් මාසයේ වුවත් මෙවර අයවැය ඉදිරිපත් වෙන්නේ සිංහල හින්දු අවුරුදු සමයේ බැවිනි.