(තිළිණි ද සිල්වා සහ රංජන් කටුගම්පොළ)
 
අමාත්‍ය මණ්ඩල තීරණයක් අනුව වැඩිකර තිබූ පොලිස් නිලධාරීන්ට නීත්‍යනුකූලව හිමිවිය යුතු ඒකාබද්ධ දීමනාව අඩුකිරීමට තීරණය කිරීමෙන් තම මූලික අයිතිවාසිකම් කඩවී ඇතැයි පවසමින් තම දීමනාව අඩුකිරීමට ගත් තීරණය අහෝසිකර වැඩිකළ දීමනාව ඒ අයුරින් ගෙවීමට නියෝග කරන්නැයි ඉල්ලා පොලිස් නිලධාරීන් පිරිසක් ශ්‍රේෂ්ඨාධිකරණයට මූලික අයිතිවාසිකම් පෙත්සමක් ගොනු කර ඇත.
 
මොණරාගල පදිංචි අමිල මහේෂ් ලංකාතිලක මහතා ඇතුළු 6දෙනෙකු විසින් ගොනු කර තිබූ මෙම පෙත්සමෙහි වගඋත්තරකරුවන් හැටියට වැඩබලන පොලිස්පති චන්දන වික‍්‍රමරත්න, ආරක්ෂක ලේකම්, නීතිපති, අග‍්‍රාමාත්‍ය රනිල් වික‍්‍රමසිංහ මහතා ඇතුළු අමාත්‍ය මණ්ඩලය නම් කරනු ලැබ ඇත.
 
පෙත්සමේ මෙසේද සඳහන් වේ.
 
පෙත්සම්කරුවෝ විවිධ නිල මට්ටම්වලට අයත් පොලිස් නිලධාරීහු වෙති. පොලිස් ආඥා පනතට අනුව පැය 24ක සේවා කාලයක් සේවයේ නියුක්ත වීමට පොලිස් නිලධාරීහු බැඳී සිටිති. ආයතන සංග‍්‍රහයේ 4 වැනි පරිච්ඡේදය අනුව ඔවුන්ට රාජකාරී, ප‍්‍රවාහන දීමනා හා ඉඳුම් හිටුම් සඳහා ඒකාබද්ධ දීමනාවක් හිමිවේ.
 
ඒ අනුව මෙම ඒකාබද්ධ දීමනාව 2018 අගෝස්තු 21 වැනිදා අංක 20 / 2018 දරණ චක‍්‍රලේඛය අනුව සංශෝධනය කෙරිණි. ඒ අනුව මාසික මූලික වැටුප රුපියල් 32,799ක් දක්වා හිමි අයට රුපියල් 700ක්ද , රුපියල් 32,780 සිට රුපියල් 43,479 දක්වා වැටුප් හිමි අයට රුපියල් 800ක්ද , රුපියල් 43,480 කට වඩා ඉහළ වැටුප් තලවලට හිමිකම් කියන නිලධාරීන්ට රුපියල් 1000 ක් වන පරිදි මෙම දීමනා සංශෝධනය කෙරිණි.

එහෙත් මෙම සංශෝධන දීමනා මෙතෙක් පෙත්සම්කරුවන්ට ලැබී නොමැත. එහෙත් රාජ්‍ය බුද්ධි අංශයේ සහ ජනාධිපති ආරක්ෂක අංශයේ රාජකාරියේ නියුතු පොලිස් නිලධාරීන්ට මෙම දීමනාව හිමිවේ.
 
තත්ත්වය මෙසේ තිබියදී පසුගිය මැයි 10 වැනිදා පොලිස්පතිවරයා විසින් නිකුත් කරන ලද නිවේදනයකට අනුව මෙම දීමනා දින 14කට පමණක් ගෙවීමට අමාත්‍ය මණ්ඩලය තීරණය කර ඇතැයි හෙළිවිය.
 
අදාළ දීමනාව මෙලෙස අඩුකිරීම නීතියට පටහැනිවේ. මෙම තත්ත්වය තුළ පෙත්සම්කරුවන්ගේ මූලික අයිතිවාසිකම් කඩවී ඇත.
 
එබැවින් මෙම පෙත්සම විභාගයට ගැනීමට අවසර ලබා දෙන ලෙසද , තම මූලික අයිතිවාසිකම් කඩවී ඇති බව ප‍්‍රකාශ කරන ලෙසද, ඒකාබද්ධ දීමනාව අඩු කිරීමට ගෙන ඇති තීරණය අහෝසි කරන ලෙසද , 2018 අගෝස්තු 24 වැනිදා සංශෝධන ඒකාබද්ධ දීමනාව ගෙවීමට නියෝග කරන ලෙසද පෙත්සම්කරුවන් සිය පෙත්සමෙන් ඉල්ලා ඇත.