(ඩී.ජී.සුගතපාල ,ජි.ඩබ්ලිව්.ප්‍රේමතිලකද සිල්වා)

එක්සත් ජාතික පක්ෂයේ මෙන්ම තම පක්ෂයේද අර්බුද තිබෙන නමුත් මෙවර මැතිවරණයේදීත් පැරෂුට්කාරයන් ගෙන ආවොත් ජනතාව සමග එක්ව අරගල කරන බවත් ගාල්ල දිස්ත්‍රික් පාර්ලිමේන්තු මන්ත්‍රි නිශාන්ත මුතුහෙට්ටිගම (එ.ජ.නි.ස) මහතා පැවසීය. ඒ මහතා මේ බව පැවසූයේ වත්මන් දේශපාලන තත්වය හා ඉදිරි මැතිවරණය සම්බන්ධයෙන් කරුණු පැහැදිලි කිරීම සඳහා ගාල්ලේ පිහිටි ඒ මහතාගේ කාර්යාලයේ අද (08) පැවති මාධ්‍ය සාකච්ඡාවකදීය.

එහිදි මන්ත්‍රිවරයා වැඩි දුරටත් කියා සිටියේ 2009 පළාත් සභා මැතිවරණයේදි අනර්කලි සහ සජින් වාස් ගුණවර්ධන වැනි පැරෂුට් කාරයින් ගාල්ලට ගෙනෙන ලද නමුත් තමන් ඔවුන් සමග සටන් කොට ජයගත් බවයි. අද ඔවුන් සිටින්නේ කොහේදවත් නොදන්නා බවත්, මෙවරද එසේ පැරෂුට්කාරයින් ගෙනාවොත් ජනතාව සමග අරගල කරන බවත් ඒ මහතා කීය.

ඒ නිසා ඉදිරි මැතිවරණයේදී මොන නළුවන්, නිළියන්, ක්‍රීඩකයින් ගෙනාවත් ගාල්ල දිස්ත්‍රික්කයෙන් තමන් ජයගන්නා බවත් මේ වනවිට රටේ ප්‍රධාන පක්ෂය බවට පත්ව ඇත්තේ  එක්සත් ජාතික පක්ෂය හෝ ශ්‍රී ලංකා නිදහස් පක්ෂය නොව  පොදුජන පෙරමුණ බවත් පොහොට්ටුව දිනන ලකුණ බවත් ශ්‍රී ලංකා නිදහස් පක්ෂයේ තැනක් නැති වුණොත් මහින්ද රාජපක්ෂ මහතා යටතට යන බවත් මන්ත්‍රිවරයා වැඩි දුරටත් කියා සිටියේය.