(හිරාන් ප්‍රියංකර ජයසිංහ)
 
පුත්තලම - මන්නාරම පැරණි මාර්ගය නැවත දැනුම් දෙන තුරු අද( 14 ) සිට  වසා දැමු බව පුත්තලම ආපදා කළමණාකරණ ඒකකය පවසයි.
 
කඳුකර ප්‍රදේශවලට බලපෑ වර්ෂාවත් සමග කලාඔයේ ජල මට්ටම ශීඝ්‍රයෙන් ඉහළ යාම හේතුවෙන් වනාතවිල්ලුව එළුවන්කුලම හරස් මාර්ගය අද අලුයම වන විට අඩි තුනකට ආසන්න ජල ප්‍රමාණයක් ගලා ගිය බවද ඒ අනුව පුත්තලම මන්නාරම මාර්ගය නැවත දැනුම් දෙන තුරු වසා දැමීමට කටයුතු කළ බවද, පුත්තලම ආපදා කළමනාකරණ එකකයේ සහකාර අධ්‍යක්ෂ ඒ. එම්. ආර්. එන්. කේ. අලහකොන් මහතා පවසයි.
 
සහකාර අධ්‍යක්ෂවරයා වැඩිදුරටත් පවසා සිටියේ මේ හේතුවෙන් මන්නාරම සිට පුත්තලම දක්වා හා පුත්තලමේ සිට මන්නාරම දෙසට ගමන් කරන ජනතාවට තාවකාලිකව විකල්ප මාර්ග භාවිතා කරන ලෙසයි.
 
විල්පත්තුව ජාතික වන උද්‍යානය මැදින් පිහිටා ඇති මෙම මාර්ගය මන්නාරමට ළඟාවීමට ඇති කෙටිම මාර්ගය ද වෙයි. එය අනුරාධපුර මන්නාරම මාර්ගයට වඩා කිලෝ මීටර් 100 කට අඩු දුරකින් යුක්ත වන බවද කියයි. මේ හේතු සහ විල්පත්තුව ජාතික වන උද්‍යානය නරඹමින් ගමන් කිරීමට හැකියාව පැවතීම නිසා බොහෝ පිරිසක් මෑත කාලයේ සිට මෙම මාර්ගය භාවිත කිරීමට පුරුදුව සිටියහ.
 
කෙසේ නමුත් පසුගිය දිනවල පැවති වර්ෂාව හේතුවෙන් විල්පත්තුව මැදින් වු මාර්ගයේ ගමන් කිරීමට අපහසු වූ බව වනජීවි නිලධාරීහු පවසති.