(බිඟුන් මේනක ගමගේ) 
 
අලුතින් බඳවා ගත් ප්‍රාදේශීය ළමා ආරක්ෂක නිලධාරින්ට පස් දින විශේෂ පුහුණුවක් දෙන බව ජාතික ළමා ආරක්ෂක අධිකාරිය පවසයි. 

ශ්‍රී ලංකා ළමා දුරකථන සේවය( 1929)  හරහා ජාතික ළමා ආරක්ෂක අධිකාරිය වෙත වාර්තා වන ළමා අපයෝජන පැමිණිලි සම්බන්ධව පසුවිපරම් කිරීම,  ග්‍රාමීය මට්ටමින් ප්‍රජාව වෙත සමීප වෙමින් අපයෝජනයන්ගෙන් දරුවන් ආරක්ෂා කරගැනීමට අදාළ සියලු පාර්ශ්ව දැනුම්වත් කිරීම හා ළමුන්ගේ අයිතිවාසිකම් සුරක්ෂිත කිරීමට කැපවීම යන මූලික කාරණා යටතේ මෙම පුහුණුව ලබා දෙන බව එම අධිකාරිය පවසයි.
 
ජාතික ළමා ආරක්ෂක අධිකාරියේ සභාපති නීතිඥ එච්.එම් අබේරත්න මහතාගේ මූලිකත්වයෙන් මෙම පුහුණුව ලබාදෙන අතර විෂය ප්‍රාමාණික සම්පත් දායකයන් විසින් සිදුකරනු ලබන දේශන හා සැසිවලින් එය සමන්විත වේ.
 
ළමා අපචාර වැළැක්වීම සහ එවැනි අපචාරවලට ගොදුරු වූ ළමුන් ආරක්ෂා කිරීම හා ඔවුන්ට ප්‍රතිකාර කිරීම පිළිබඳ ජාතික ප්‍රතිපත්තියක්  සකස් කිරීමෙහිලා ආණ්ඩුවට උපදෙස් දීම ඇතුළු දරුවන් සම්බන්ධයෙන් මූලික රාජ්‍යමය මැදිහත්වීම් බලය ජාතික ළමා ආරක්ෂක අධිකාරියට හිමිය.