(ශාන්ත ප්‍රදීප් කුමාර කුලරත්න)

කැස්බෑව රාජ්‍ය බැංකුවක මුදල් අයකැමි නිලධාරිනියකට කොරෝනා වයිරසය ආසාදනය වීම හේතුවෙන් එම ශාඛාව අද (19) දා සිට තාවකාලිකව වසා දැමීමට පියවර ගත් බව කැස්බෑව සෞඛ්‍ය වෛද්‍ය නිලධාරී වෛද්‍ය සමන්තිකා විජේසුන්දර මහත්මිය පැවසුවාය.

ඒ අනුව එම ශාඛාවේ සේවය කරන කළමනාකාර තුමිය ඇතුළු කාර්ය මණ්ඩලයේ හත් දෙනෙකු ස්වයං නිරෝධායනයට  ලක් කළ බව සෞඛ්‍යය වෛද්‍ය නිලධාරීවරිය පැවසුවාය.

බණ්ඩාරගම ප්‍රදේශයේ පදිංචි ආසාදිත කාන්තාව අවසන් වරට සේවයට පැමිණ ඇත්තේ ඊයේ 18 දා වන අතර එදින සිදුකළ පී.සී.ආර් පරීක්ෂණයක ප්‍රතිඵලය අද (19) ලැබීමත් සමග මේ බව තහවුරු වී ඇති බව පැවසේ.

ඒ අනුව බැංකු ශාඛාව මේ වන විට සම්පූර්ණයෙන් විසබීජහරණයට ලක් කර මෙසේ තාවකාලිකව වසා දැමීමට පියවර ගත් බවත් එම ශාඛාව විවෘත කිරීමට අවශ්‍ය නම් වෙනත් කාර්ය මණ්ඩලයක් යොදවා විවෘත කිරීමට හැකි බව බලධාරීන්ට දැනුම් දුන් බවත්  සෞඛ්‍ය වෛද්‍ය නිලධාරී වෛද්‍ය සමන්තිකා  විජේසුන්දර මහත්මිය වැඩිදුරටත් පැවසුවාය.