පසුගිය මාස 4 ක කාලය තුළ ඉන්දියාවේ කාශ්මීර් ප‍්‍රදේශයට පැමිණි ශ්‍රී ලාංකිකයන් පිළිබඳව එරට බුද්ධි අංශ බලධාරීන් විමර්ශනයක් ආරම්භ කර ඇතැයි ඉන්දීයවේ එන්.ඩී.ටී.වී පුවත්සේවය අද (5) වාර්තා කළේය.

ශ්‍රී ලංකාවේ පාස්කු ඉරිදා ප‍්‍රහාරයට සම්බන්ධ පුද්ගලයන් ඉන්දියාවේ කේරළයේ, කාශ්මීරයේ සහ බැංගලෝරයේදී පුහුණුව ලබා ඇති බවට ශ්‍රී ලංකා යුද හමුදාපතිවරයා බී.බී.සී ප‍්‍රවෘත්ති සේවයට සිදු කළ ප‍්‍රකාශයකින් පසුව මෙලෙස ඉන්දියාවට , විශේෂයෙන්ම එරට කාශ්මීර ප‍්‍රදේශයේ සංචාරය කළ ලාංකිකයින් පිළිබඳ විමර්ශනය කිරීමට තීරණය කළ බව ඉන්දීය රජයේ ජ්‍යෙෂ්ඨ ප‍්‍රකාශකයකු උපුටා දක්වමින් එම පුවත් සේවය සඳහන් කර සිටී.

මේ වන විට  පසුගිය මාස හතරක කාලය තුළ ලාංකිකයින් 20 දෙනෙකු කාශ්මීර පශ්‍රී දේශයේ සංචාරය කළ ඇති බව බුද්ධි අංශ නිලධාරීන් කරුණු තහවුරු කර ගෙන ඇති අතර ඔවුන් පිළිබඳ වැඩිදුරටත් තොරතුරු නිරීක්ෂණය කරමින් සිටින බව එම නිලධාරියා එන්.ඩී.ටී.වී ප‍්‍රවෘත්ති සේවය හමුවේ පවසා ඇත.

දැනට තහවුරු වී ඇති කරුණු අනුව එම ලාංකිකයින් ලියාපදිංචි සංචාරකයින් බවද එම නිලධාරියා වැඩිදුරටත් කියා සිටියේය.

සංචාරකයින් 15,000කට ආසන්න පිරිසක් පසුගිය මාස 4 දී කාශ්මීරයට පැමිණ ඇති අතර ඉන් බහුතරයක් සංචාරකයින් මැලේසියානු ජාතිකයෝ වෙති.

පාස්කු ඉරිදා ප‍්‍රහාරයට සම්බන්ධ පුද්ගලයන් කාශ්මීරය ඇතුළු ඉන්දියාවේ ප‍්‍රදේශ කිහිපයක සංචාරවල නිරතවී ඇති බවට ශ්‍රී ලංකා හමුදාපතිවරයා බී.බී.සී ප‍්‍රවෘත්ති සේවයට සිදුකළ ප‍්‍රකාශයකින් පසුව ඉන්දිය බුද්ධි අංශ සේවා මෙම පරීක්ෂණය සිදුකරමින් සිටින අතර විශේෂයෙන් ඔවුන්ගේ පසුබිම පිළිබඳව මෙහිදී සොයාබලන අතර, කාශ්මීරයේ සංචාරය කළ පුද්ගලයන් පිළිබඳව වැඩි අවධානයක් යොමු කර ඇත.

කෙසේ වෙතත් ශ්‍රී ලංකා රජය පාස්කු ඉරිදා ප‍්‍රහාරය සම්බන්ධ පුද්ගලයන් පිළිබඳ තොරතුරු තමන්ට ලබාදී නොමැති බවත්, මෙම ප‍්‍රහාරය අයි.එස්. සංවිධානයේ පූර්වාදර්ශයෙන් සිදුකළ බවට තොරතුරු ලැබී ඇති නිසා ඒ පිළිබඳව ඉන්දියාව විශේෂ අවධානයක් යොමු කරනවා යැයි ද එම ඉන්දීය ජ්‍යෙෂ්ඨ නිලධාරියා  එන්.ඩී.ටී.වී. ප‍්‍රවෘත්ති සේවයට වැඩිදුරටත් සඳහන් කර  ඇත.

මෙම පාස්කු ඉරිදා ප‍්‍රහාරයට සම්බන්ධ කිසිවෙකු කාශ්මීරයේ සංචාරය කළ බවට දැනට තොරතුරු නොමැති බවත්, කෙසේ නමුත් ඔවුන් වෙනත් නම් භාවිත කරමින් එහි සංචාරය කළේද යන්න පිළිබඳ තවදුරටත් සොයා බලමින් සිටින බවද ඉන්දීය බුද්ධි සේවා අංශ උපුටා දක්වමින් එන්.ඞී.ටී.වී ප‍්‍රවෘත්ති සේවය වාර්තා කර සිටී.

(125)