(දිනේෂ් උපේන්ද්‍ර)                                                                                 
            
කුලියාපිටියේ මුස්ලිම් ව්‍යාපාරික ආයතන කිහිපයකට පහරදුන් බවට සැකපිට රක්‍ෂිත බන්ධනාගාර ගතව සිටි සැකකරුවන් 11දෙනෙකුට අදාළ නඩු 13කදී, එහි දොළොස්වෙනි සැකකරු යැයි අද(13) පොලිසිය විසින් නම්කරමින් අධිකරණයට ඉදිරිපත් කළ සැකකරු සමඟ පළමු  සහ දෙවන සැකකරුවන් යළිත් මේ මස 21 දක්වා රක්‍ෂිත බන්ධනාගාර ගත කිරීමට කුලියාපිටිය මහේස්ත‍්‍රාත් ජනනි එස් විජේතුංග මහත්මිය නියම කළාය.
            
එහි සෙසු සැකකරුවන් එක් අයෙකුට රුපියල් ලක්‍ෂ දෙක බැගින් වූ ශරීර ඇප දෙකක් මත මුදාහැරීමටද මහේස්ත‍්‍රාත්වරිය නියෝගකර තිබිණ.
            
ඉකුත් මස 12 දින කුලියාපිටිය හෙට්ටිපොළ පාරේ වෙළඳ ස්ථාන කිහිපයකට එසේ පහරදී තිබූ අතර ඒ සම්බන්ධව විමර්ශනය කර පොලිසිය මගින් අදාළ සැකකරුවන් අත්අඩංගුවට ගෙන තිබිණ.
            
2007 අංක 56 දරණ සිවිල් හා දේශපාලන අයිතීන් පිළිබඳ ජාත්‍යන්තර සම්මුති පනතට අදාළව සැකකරුවන් කටයුතු කර ඇත්දැයි විමර්ශනය කරමින් පවතින බව පොලිසිය කියාසිටියේය. කෙසේවෙතත් සැකකරුවන්ගෙන් කොටසකට සාමාන්‍ය නීතිය යටතේ නඩු පැවරීම සම්බන්ධව පොලිසියේ විරෝධතාවයක් නොවීය.
            
මෙම බී වාර්තාව අනුව එම සැකකරුවන් දණ්ඩනීති සංග‍්‍රහය නොව මෙම නඩුවෙන් මුදාහළයුතු බවට කරුණු පෙන්වාදුන් සැකකරුවන් වෙනුවෙන් පෙනී සිටි නීතිඥයන් කියාසිටියේ පොලිසිය වැල යන අතට මැස්ස ගහන න්‍යායයේ ක‍්‍රමවේද මෙම නඩුවේ සැකකරුවන්ට චෝදනා ගොනුකිරීමට අනුගමනය කරන බවයි.
            
එහිදී සියලූ පාර්ශව ඉදිරිපත් කළ කරුණු පිළිබඳව දීර්ඝව අවධානය යොමුකළ මහේස්ත‍්‍රාත් ජනනි මහත්මිය එසේ 1,2 හා 12 යන සැකකරුවන් හැර සෙසු සැකකරුවන් ඇප මුදාහැරීමට නියම කළාය.
            
මෙම නඩුවේ පැමිණිල්ල වෙනුවෙන් පොලිස් නීති කොට්ඨාසයේ පොලිස් පරීක්‍ෂක නීතිඥ කලූතර කෝරළ, පොලිස් පරීක්‍ෂක හැරිසන් සෝමසිරි, පොලිස් සැරයන්වරුන් වූ ප‍්‍රියංකර(7313), පේ‍්‍රමසූරිය(25487) යන මහත්වරුද සැකකරුවන් වෙනුවෙන් චන්දන යාපා, කැලූම් හෙට්ටිගමගේ, චමිපික ලසිතකුමාර, ආසිරි ප‍්‍රනාන්දු, මායාදුන්නේ සෙනවිරත්න, අනුරසිරි දිසානායක, දයානි එදිරිසිංහ යන මහත්ම මහත්මීහු ද පෙනීසිටියහ.