ඉන්දු-චීන දේශසීමාවේ වෙඩි තැබීමක් සිදුව ඇතැයි ඉන්දීය මාධ්‍ය වාර්තා කරයි. වෙඩි තැබීම සිදුව ඇත්තේ දේශසීමාවේ පිහිටි නැගෙනහිර ලඩාක් ප්‍රදේශයේ යැයි ද වාර්තා වේ.

මාස තුනකට ආසන්න කාලයක් මුළුල්ලේ ඉන්දු-චීන හමුදා අතර මෙම ප්‍රදේශයේ ගැටුම් පවතී. 

දේශසීමාවේ ඉන්දු චීන හමුදා අතර නිරන්තරයෙන් ඇති වන ගැටුම් සමනය කිරීම සඳහා දෙරට අතර මාස තුනක් තිස්සේ සාකච්ඡා පැවැත්වෙන නමුත් තවමත් විසඳුමකට පැමිණීමට දෙපාර්ශවයම අසමත් වී තිබේ. 

ලඩාක් ප්‍රදේශයේ පන්ගොන් විලේ දකුණු ඉවුර සහ ඒ ආශ්‍රිත ප්‍රදේශය ඉහළ උපායමාර්ගික වැදගත්කමක් ඇති ප්‍රදේශයෙක් ලෙස සැලකේ. එම ප්‍රදේශයේ බලය තහවුරු කරගැනීමට ඉන්දීය හමුදා සමත් වී තිබෙන අතර චීන හමුදා පසුගිය දිනෙක එම ප්‍රදේශයේ බලය අල්ලා ගැනීමට උත්සාහ කළේ යැයි ද ඉන්දීය හමුදා එම උත්සහාය ව්‍යර්ථ කළේ යැයි ද ඉන්දීය මාධ්‍ය වාර්තා කර තිබිණි. 

ඉකුත් අප්‍රේල් මාසයේ සිට ඉන්දියාව සහ චීනය අතර දේශසීමාවේ ගැටුම් පවතින අතර චීන හමුදා අවස්ථා කිහිපයදීම ඉන්දීය පාලන ප්‍රදේශවලට කඩා වැදුණි. ගල්වාන් නිම්නය ආසන්නයේ දී මේ ආකාරයෙන් අවස්ථා කිහිපයදීම ගැටුම් ඇති වූ අතර එක් අවස්ථාවකදී එම ගැටුම් හේතුවෙන් ඉන්දීය හමුදාවේ 20 දෙනෙක් ජීවතක්ෂයට පත්වූහ.

පසුගිය කාලයේදී දෙරටේ හමුදාවල ලුතිනන් ජෙනරාල්වරුන්ගේ මට්ටමින් ද සාකච්ඡා පැවැත්වුණු අතර ඒ කිසිවකදී විසඳුමකට පැමිණීමට දෙපාර්ශවයම අසමත්ව ඇත.

‘ටයිම්ස් ඔෆ් ඉන්දියා’ ඇසුරිනි

055