(බිමල් ශ්‍යාමන් ජයසිංහ)

රජයේ රාජ්‍ය අමාත්‍යවරයකුගේ සම්බන්ධීකරණ ලේකම්වරයකු ලෙස පෙනී සිටිමින් රුපියල් එක්කෝටි විසි ලක්ෂයක මුදලක් වංචා කළ පුද්ගලයකු කැලණියේ දී අත්අඩංගුවට ගත් බව කොළඹ අපරාධ කොට්ඨාසය කියයි.

සැකකාර පුද්ගලයා සන්තකේ තිබී ප්‍රවාහන අමාත්‍යාංශයෙන් නිකුත් කළ බවට හැඟවෙන ව්‍යාජ හැඳුනුම්පතක් ද තිබූ බව පොලිසිය පවසයි.

විදේශ රටකින් සුඛෝපභෝගී වාහනයක් ආනයනය කර ලබාදෙන බව පවසා බදුල්ල ප්‍රදේශයේ පුද්ගලයකුගෙන් මීට මාස හයකට පමණ ඉහතදී මෙම මුදල් ලබාගෙන ඇත.

විවිධ හේතු දක්වමින් දිනෙන් දින වාහනය ලබාදීම ප්‍රමාද කිරීම සම්බන්ධයෙන් ගැනුම්කරු  කොළඹ අපරාධ කොට්ඨාසයට කරන ලද පැමිණිල්ලක් අනුව විමර්ශන සිදු කිරීමෙන් අනතුරුව සැකකරු අත්අඩංගුවට ගෙන ඇත.

අත්අඩංගුවට ගත් 28 හැවිරිදි සැකකරු ප්‍රවාහන අමාත්‍යවරයා ගේ සම්බන්ධීකරණ ලේකම්වරයා හෝ අමාත්‍යාංශයේ සේවය කරන අයකු නොවන බව පොලිස් නිලධාරියෙක් පැවැසීය.