(තරිඳු ජයවර්ධන)

මන්නාරම සමූහ මිනීවලේ මෑතක අස්ථි කොටස් ඇතැයි කාබන් පරීක්ෂාවේදී තහවුරු වුවහොත් අතුරුදන්වූවන්ගේ ඥාතීන් ඞීඑන්ඒ පරීක්ෂාවකට ලක් කර සසඳා බැලීමක් සිදු කිරීමට සිදු වනු ඇතැයි අතුරුදන්වූවන්ගේ කාර්යාලයේ සභාපති ජනාධිපති නීතීඥ සාලිය පීරිස් මහතා පැවසීය.

ඒ සියල්ල තීරණය වන්නේ කාබන් කාලනිර්ණය පරීක්ෂණයෙන් වාර්තාව සැකසීමෙන් පසු මෙහි ප‍්‍රධාන විමර්ශකයා වන මන්නාරම අධිකරණ වෛද්‍ය විශේෂඥ සමින්ද රාජපක්ෂ මහතා පූර්ණ වාර්තාවක් මහේස්ත‍්‍රාත්වරයා වෙත ලබාදීමෙන් පසුව යැයි ද ඒ මහතා කීවේය.

සාලිය පීරිස් මහතා මෙසේ ද කීවේය.

    ”මන්නාරම සමූහ මිනීවළ සම්බන්ධයෙන් අතුරුදන්වූ තැනැත්තන් පිළිබඳ කාර්යාලය ප‍්‍රධාන වශයෙන් කළේ මිනී වළ හැරීම සහ ඇටසැකිළි ගොඩ ගැනීම සඳහා අධිකරණ වෛද්‍යවරයාට අවශ්‍ය වියදම් පියවීමයි. දෛනික වියදම් වගේම ගොඩ ගත්ත ඇටසැකිලි සාම්පල පර්යේෂණාගාරවලට යැවීම සඳහා වන වියදම් අපේ කාර්යාලයෙන් පියෙව්වා. එසේ කළේ නැති නම් මේ ක‍්‍රියාදාමය අඩාල වෙන්න ඉඩ තිබ්බා.

පනත යටතේ අපට පැවරිලා තිබෙන එක කාර්යක් තමයි මිනීවළවල් තියෙනවා නම් ඒවා ගොඩගැනීම සම්බන්ධයෙන් මහේස්ත‍්‍රාත්වරුන්ගෙන් ඉල්ලීම් කරන්න පුලූවන්. අපට නිරීක්ෂකයන් ලෙස කටයුතු කරන්නත් පුලූවන්. අපි ප‍්‍රධාන වශයෙන් ක‍්‍රියාකාරී නිරීක්ෂකයන් විදියට සහභාගී වුණා. මෙම පරීක්ෂණවල මූලිකත්වය ගන්නේ මන්නාරම අධිකරණ වෛද්‍ය විශේෂඥ සමින්ද රාජපක්ෂ මහතායි. කාබන් දින පරීක්ෂණ වාර්තා ලැබුණු පසු අධිකරණ වෛද්‍ය නිලධාරීතුමා සහ ඔහුගේ කණ්ඩායම ඒ දත්තත් ඇසුරෙන් පූර්ණ වාර්තාවක් සකස් කළ යුතු වෙනවා.

ඒ පරීක්ෂණ වාර්තාවට පස්සේ තමයි ඉදිරි පියවර ගැනීම සම්බන්ධයෙන් මහේස්ත‍්‍රාත්තුමාට තීරණය කරන්න වෙන්නේ. කාබන් දින පරීක්ෂණයේ ප‍්‍රතිඵලයත් ඊට වැදගත් වෙනවා. මෑත කාලයේ ඇටසැකිලිත් තිබෙන බවට කාබන් පරීක්ෂණයේදී තහවුරු වුණොත් ඉන් පසු කල්පනාකරන්න වෙනවා කොහොමද හඳුනා ගැනීම් කරන්නේ කියලා. එය දෙවැනි අධියරයි. හඳුනාගැනීම සඳහාත් අතුරුදන් වූවන්ගේ ඥාතීන්ගේ ඞීඑන්ඒ සාම්පල පරීක්ෂණයක් කරන්න වෙයි. ”