(බිඟුන් මේනක ගමගේ )
 
අනවසර ගිනි අවි සහ සුළු අවිවල බලපෑමෙන් සමාජය මුදාගැනීම සඳහා ජාතික හා ජාත්‍යන්තර වශයෙන් වහා ගත යුතු පියවර අටක් රජයට යෝජනා කරමින් නිරවිකරණය සහ සංවර්ධනය පිළිබඳ සංසදය නිවේදනයක් නිකුත් කර ඇත.
 
 1996 අංක 22 දරණ ගිනි අවි පනත, 2005 අංක 18 දරන පුපුරණ ද්‍රව්‍ය පනත, 1948 අංක 20 දරන ආගමන විගමන පනත යන පනත් තුන සංශෝධනය කිරීමත් 2008 වසර දක්වා ක්‍රියාත්මක වූ නීතිවිරෝධී හා සුළු ගිනි අවි ව්‍යාප්තියට එරෙහි ජාතික කොමිෂන් සභාව නැවත ස්ථාපිත කිරීමත් ජාතික වශයෙන් වූ යෝජනා වේ.
 
 සියලු ආකාරවලින් සුළු අවි සහ සැහැල්ලු ආයුධ නීති විරෝධී ලෙස වෙළෙඳාම් කිරීම වැලැක්වීම හා තුරන් කිරීම සඳහා වන එක්සත් ජාතින්ගේ ක්‍රියාත්මක සැලසුම සමග නැවත සම්බන්ධ වීම, අවි වෙළෙඳාම පිළිබඳ එක්සත් ජාතින්ගේ සම්මුතියට ප්‍රවේශ වීම, අවි ආයුධ පුපුරන ද්‍රව්‍ය සහ ත්‍රස්තවාදිය හා සම්බන්ධ එක්සත් ජාතින්ගේ අනෙකුත් ප්‍රඥප්ති සහ යෝජනා සම්මතවලට සාධනීය අයුරින් සම්බන්ධ වීම හා තොරතුරු බෙදාගැනීමට මානව සම්පත පුහුණු කිරීම ඇතුලුව තාක්ෂණික සහාය ලබාගැනීමට අවශ්‍ය සහාය ලබාගැනීමට ජාත්‍යන්තර ප්‍රජාව සමඟ සම්බන්ධ වීම ජාත්‍යන්තර වශයෙන් කරන යෝජනා වේ.
 
පාස්කු ඉරිදා ප්‍රහාරයෙන් පසුව ආරක්ෂක අංශ කරන පරීක්ෂා කිරීම්වලදී මේ වනවිට හමුව ඇති පුපුරන ද්‍රව්‍ය හා අවි ආයුධ සංඛ්‍යාත්මකව ගතහොත් සමාජයක් තැතිගන්වන තරමක යැයි ද මෙය ඉතාම බරපතල තත්ත්වයක් යැයි ද නිරවිකරණය සහ සංවර්ධනය පිළිබඳ සංසදයේ සම්බන්ධීකාරක විද්‍යා අභයගුණවර්ධන මහතා පවසයි.
 
මෙම අත්‍යවශ්‍ය කාරණා සම්බන්ධයෙන් පියවර ගන්නැයි රජයට කාලයක් තිස්සේ අවධාරණය කළ ද එය අවධානයට ගත්තේ නැතැයි ද මෙම තත්ත්ව හමුවේ හෝ ඒ සම්බන්ධයෙන් පියවර ගන්නැයි ඉල්ලා සිටින බව ද නිරවිකරණය සහ සංවර්ධනය පිළිබඳ සංසදයේ සම්බන්ධීකාරක විද්‍යා අභයගුණවර්ධන මහතා එම නිවේදනයෙහි වැඩිදුරටත් සඳහන් කර ඇත.