(දඹුල්ල කාංචන කුමාර ආරියදාස)

දින තුනක සිට ඇද හැලෙන වර්ෂාව හේතුවෙන් මාතලේ දිස්ත්‍රික්කයේ පවුල් 81ක ජනතාව මේ වනවිට ආරක්ෂිත ස්ථානවල රඳවා ඇතැයි මාතලේ දිස්ත්‍රික් ආපදා කළමනාකරණ ප්‍රධානී චමින්ද අමරවීර මහතා සඳහන් කළේය.

පවතින ගංවතුර තත්ත්වය හේතුවෙන් දඹුල්ල, යටවත්ත, පල්ලේපොල යන ප්‍රාදේශීය ලේකම් කොට්ඨාස වල මෙසේ කඳවුරු පිහිටුවා තිබෙන බවද හෙතෙම සඳහන් කළේය.

යටවත්ත ප්‍රදේශයේ පවුල් 47 පල්ලේපොල ප්‍රදේශයේ කඳවුරු පිහිටුවා ඇත.  දඹුල්ල ප්‍රදේශයේ ස්ථාන දෙකක පවුල් 22 ක්, පල්ලේපොල ප්‍රදේශයේ 12ක් ආකාරයෙන් රඳවා තිබේ.

දින තුනක සිට මේ දක්වාම නොකඩවා ඇද හැලෙන වර්ෂාව හේතුවෙන් මාතලේ දිස්ත්‍රික්කයේ නිවාස 70කට පමණ හානි වී තිබෙන බවද හෙතෙම සඳහන් කළේය.

මාර්ග 12ක පමණ ගමනාගමන කටයුතුවලට බාධා එල්ල වන ආකාරයෙන් ගස් කඩා වැටීම් නායයෑම් සහ ජලයෙන්  යටවී වාර්තා වී තිබේ.

අද (21) දහවල් වනවිට මෙම තත්වය හාත්පසින්ම වෙනස් විය හැකි බවත් තොරතුරු වාර්තා වීම් පවා සිදු කර ගැනීමට නොහැකි තත්ත්වයක පවතින ඒ මහතා වැඩිදුරටත් පැවසීය.

කණ්ඩලම වැව ඉබ්බන්කටුව  ජලාශයේ දඹුල්ල පන්සලේ වැව පහළ වැව රන්දෙනිය වැව තවමත් පිටාර ගලමින් පවතී.   එසේ පිටකරන ජලය දඹුලු ඔය හරහා කලා වැවට මුදා හැරේ.  පහළ ප්‍රදේශ මෙම ජලගැලීම හේතුවෙන් යටවී ඇත. දඹුල්ල ගම්උදාව ප්‍රදේශයේ කොටසක් ජලයෙන් යටවී තිබේ. තම්මන් ඇළ පිටාර ගැලීම නිසා නව පාදෙණිය ප්‍රදේශය ජලයෙන් යටවී ඇත.