(නිශාන්ත කුමාර)

කොරෝනා වෛරසය ශරීරගත වී ඇති බවට සැක කරමින් බදුල්ල මහ රෝහලට ඇතුළත් කළ තරුණියට කොරෝනා වෛරසය ශරීරගත වී  නොමැති බව තහවුරු කර කරගැනීමෙන් පසුව ඇය අද (07) රෝහලින්  බැහැර කළ බව බදුල්ල මහ රෝහලේ  අධ්‍යක්ෂක වෛද්‍ය උපුල් කරුණාරත්න මහතා පැවසීය.

බදුල්ල පළාත් මහ රෝහලේ විශේෂ  ප්‍රතිකාර ඒකකයක රඳවාගෙන දින තුනක කාලයක්  ප්‍රතිකාර කළ තරුණිය අද (07) රෝහලේ ගිලන් රථයකින්ම මොනරාගල ඇයගේ නිවසට වෙත ගෙනගොස්  සුරක්ෂිතව භාරදුන් බවද වෛද්‍ය අධිකාරී අධිකාරීවරයා පැවසීය.

මේ සම්බන්ධයෙන් වැඩිදුරටත් අදහස් දැක්වූ රෝහලේ විශේෂ ශ්‍රේණියේ ප්‍රධාන හෙද නිලධාරි දර්ශන  වීරසේකර මහතා මෙසේ පැවසීය.

          ‘‘කොරෝනා වෛරසය ශරීර ගත වූ බවට සැක කරමින් ඉකුත් 05 වැනිදා මොනරාගල බුද්දම ප්‍රදේශයේ වයස අවුරුදු  22 ක  තරුණියක් මෙම රෝහලට ඇතුළත් කළා.

ඇය චිනයේ  විශ්ව විද්‍යාලයක අධ්‍යාපනය ලබා ශ්‍රී ලංකාවට පැමිණි තරුණියක් බවත් ඇයට කිසියම් රෝගී තත්ත්වයක ලක්ෂණ මතුවීම ඇයව රෝහල් ගතකළ බවත් එහිදී අනාවරණය වුණා.

කෙසේ වෙතත් කොරෝනා වෛරස්  සඳහා ප්‍රතිකාර කිරීම සඳහාම රෝහලේ සකස් කරන ලද විශේෂ ඒකකය රඳවාගෙන ඇයට අවශ්‍ය ප්‍රතිකාර ලබා දීමට   රෝහලේ   අධ්‍යක්ෂක වෛද්‍ය  උපුල් කරුණාරත්න මහතා අදාළ අංශ වෙත උපදෙස් ලබා දී තිබුණා.

ඒ අනුව රෝහලේ විශේෂඥ වෛද්‍යවරුන් හෙද හෙදියන් ඇතුළු සමස්ත කාර්ය මණ්ඩලයම  දැඩි කැපවීමකින් ඇයට අවශ්‍ය ප්‍රතිකාර උපරිම අයුරින් ලබාදීමට කටයුතු කළා.

කෙසේ වෙතත් ඇය රෝගී වී ඇත්තේ කොරෝනා වෛරසය ශරීර ගත වීමෙන් ද යන්න සම්බන්ධයෙන්යෙන් සිදුකළ පරීක්ෂණවලදී ඇයට එවැනි වෛරසයක් ඇතුලු වී නොමැති බව තහවුරු වුණා.

ඉන්පසු ඇයව අද (07)  අවශ්‍ය වෛද්‍ය උපදෙස් සහ ප්‍රතිකාර ලබාදීමෙන් පසුව රෝහලේම ගිලන් රථයකින් ඇයගේ නිවස වෙත සුරක්ෂිතව ඇරලීමට කටයුතු කරනු ලැබුවා.

ඇත්තටම ඇය රෝහලෙන් බැහැරව යද්දි රෝහලින් ලද ප්‍රතිකාර හා සැලකිලි සම්බන්ධයෙන් කාර්ය මණ්ඩලයට විශේෂ ස්තූතියක් පිරිනැමූ බවත් තමුන්ට නිවසේ සිට ප්‍රතිකාර ගන්නවා වැනි හැගීමක් දැණුනු බවත් ඇය පැවසූ බව ප්‍රධාන හේද නිලධාරී දර්ශණ වීරසේකර මහතා පැවැසීය.