(ප්‍රසාද් රුක්මල් )

කොරෝනා වයිරසය ආසාදනය වී බදුල්ල මහ රෝහලේ කෝවිඩ් 19 ප්‍රතිකාර ඒකකයට ඇතුළත් කළ ගිරාදුරුකෝට්ට රත්කිද ප්‍රදේශයේ නාවික හමුදා සෙබළා වැඩිදුර ප්‍රතිකාර සඳහා කොළඹ අයි.ඩී.එච්.රෝහලට මාරු කර යැවූ බව බදුල්ල මහ රෝහලේ කොවිඩ් 19 ප්‍රතිකාර ඒකකයේ ජ්‍යෙෂ්ඨ වෛද්‍ය , රජයේ වෛද්‍ය නිලධාරී සංගමයේ බදුල්ල ලේකම් වෛද්‍ය පාලිත රාජපක්ෂ මහතා පැවසීය.

පසුගිය  22 වැනි දින  නිවාඩු ලබා පැමිණි  සෙබළුන් 31 ක් රැගත්  බස්රථය බදුල්ල නගරයට පැමිණ ඇති බවත් අනතුරුව මෙම නාවික හමුදා සෙබළා සමඟ තවත් කිහිපදෙනෙකු එම බසයෙන් බැස බදුල්ල බස් නැවතුම්පොළට ගොස් සිය ගම්බිම් බලා යන බස්රථ වල නැග නිවෙස් කරා ගොස් ඇති බවත් පොලිසිය කීය.

ගිරාදුරුකෝට්ට රත්කිද ප්‍රදේශයේ පදිංචි කොවීඩ් 19 ආසාදිත වූමෙම නාවික හමුදා සෙබළා බදුල්ල නගරයේ සිට මහියංගණ බලා ධාවනය වූ පෞද්ගලික බස්රථයකින් මහියංගණ නගරයට ගොස් පසුව සවස මහියංගණ සිට දෙහිඅත්තකණ්ඩිය බලා ධාවනය වූ බස්රථයකින් නිවසට ගොස් ඇති බවද පොලිසිය පවසයි.

පසුව මොහු කොරෝනා වයියිරසයේ රෝග ලක්ෂණ පෙන්නුම් කරන්නට වූ හෙයින් ගිරාදුරුකෝට්ට සිට බදුල්ලට රැගෙන විත් බදුල්ල මහ රෝහලේ කොවිඩ් 19 ප්‍රතිකාර ඒකකයට මෙසේ ඇතුළත් කර ඇත.

පසුව මොහුගේ සෙම් සාම්පල පී .සී .ආර් .පරික්ෂණ සඳහා මහනුවර මහරෝහලට යැවූ බවත් එම වෛද්‍ය වාර්තාවෙන් මොහුට කෝවිඩ් 19 වයිරසය ආසාදිත වී ඇති බව අනාවරණය වු බව වෛද්‍යවරයා පැවසීය.

බදුල්ල මහරෝහලේ කොවිඩ් 19 ප්‍රතිකාර ඒකකයෙන් වාර්තා වූ  කොරෝනා වයිරසය ආසාදිත දෙවන රෝගියා මොහු වේ.