පෞරාණික බෞද්ධ කාලසටහනට අනුව දැන් වස්සානය නිමය. භාවනායෝගීව ආරණ්‍ය තුළ වැඩවිසූ භික්ෂූන් ලෝක සත්වයාගේ නිදුක් නීරෝගී හිත සුව පිණිස ගම් දනව් සිසාරා වැඩම කළ යුතු කාලය එ​ළඹ ඇත. 

ලෝ වැඩ පිණිස බුදුන්ගේ නිර්මල ධර්මය ප්‍රචාරය තරම් පිංකමක් තවත් නැත. එයට දායකවීම පමණක් ම වුවද ජාති ජාතිත් නිවන් දක්නා මහා පුණ්‍යකර්මයකි. භික්ෂුවගේ ධර්ම චාරිකාව සඳහා චීවරාදී කළමනාකරණ සපයාදීම (පූජාකිරීම) සදහම් චාරිකාව සඳහා ගිහියාගේ දායකත්වයයි. අල්ප සඟසතු දේ අතර චීවරය ප්‍රධාන ය. එබැවින් කඨින චීවර පූජාව යනු මහානුභාවනීය පුණ්‍යකර්මයකි. මෙම මහඟු පුණ්‍යකර්මය සඳහා සැදැහැවතුන්ට අවස්ථාව සලසාදෙමින්, නොවැම්බර් මස පළමුවැනිදා දෙවැනිදා සහ තුන්වැනිදා යන තෙදින රෝමයේ ධර්මාශෝක විහාරස්ථානයේ කඨින පිංකම් මාලාවක්, විහාරාධිපති නේපාලයේ ශාක්‍යනන්ද හිමියන්ගේ අනුශාසකත්වයෙන් විහාර දායක සභාව විසින් සංවිධානය කර ඇත. 

නොවැම්බර් මස පළමුවැනිදා සිකුරාදා සවස හතරේ සිට හත දක්වා චීවර පඬු පෙවීම සහ බෝධි පූජාමය පිංකම පැවැත්වේ. නොවැම්බර් මස දෙවැනිදා සෙනසුරාදා සවස හතේ සිට දහය දක්වා පිරිත් දේශන පිංකම ය. නොවැම්බර් මස තුන්වැනිදා ඉරිදා පෙරවරුවේ සිට කඨින චීවර පෙරහැර, කඨින චීවර පූජාව, නව බුදු පිළිමය නිරාවරණය කිරීම, සංඝගත දක්ෂිණාව, ධර්ම දේශනා, අටපිරිකර පූජාමය පිංකම සහ මල් වට්ටි වෙන්දේසිය ද පැවැත්වේ. සියල්ල අවසානයේ සඳකිඳුරු නාටකය සහ යශෝධරා නාටකය ද රඟදැක්වේ. 
මෙම මහා පුණ්‍යකර්මය සඳහා පිං කැමති සියල්ලෝම සහභාගී වෙත්වා! 

විහාර දායක සභාව, 
ශ්‍රී ධර්මාශෝකාරාමය, රෝමය.