දකුණු පළාතේ ඇඟලූම් කලාපයක පිවිසුම් දොරටුවට ආ යතුරු පැදි කරුවකු තමාට ආයතනයේ ප‍්‍රධානියා හමුවීමට අවශ්‍ය බව ආරක්‍ෂක නිලධාරියකුට කීවේ කලබලයෙනි. හමුවීමට ඇති හේතුව ඇසුවත් එය නොකී නිසා ආරක්‍ෂක නිලධාරියා ඔහුට ඉඩ දුන්නේ නැත.

”මගේ වයිෆ් මේකෙ වැඩ කරනවා. එයා මෙහේ මහපු ඇඳුම් කීපයක් හොරෙන් ගෙදර ගෙනිහිං තිබුණා. අම්ම අප්ප කළත් මේ වගේ හොර වැඩවලට මං කැමැති නෑ. මේක කියල ඇඳුම් ටික දීල යන්න ආවෙ” ඔහු කීවේ අලූත්ම ඇඳුම් කීපයක් බෑගයෙන් අදිමිනි.

” ඕක ලොක්කට කිව්වම එයාගෙ රස්සාවත් නැති වේවි. මේකෙ බරපතළකම තමුන් දන්නවද?” ආරක්‍ෂක නිලධාරියා සානුකම්පිතව කීවත් ඔහු වදකළ නිසා ඔහුට ඇතුළට යෑමට ඉඩ සැලසීය.

ඇතුළට ගිය ඔහු පැය බාගයකට පමණ පසු එළියට ආවේ සතුටෙනි. ඊටත් පැයකට පමණ පසු ඔහුගේ බිරිඳයැයි සිතිය හැකි කාන්තාව එළියට ආවේ කඳුළු පිසිමිනි.

මේ ගැන විමසූ ආරක්‍ෂක නිලධාරියාට ඇය කීවේ අමුතු කතාවකි. ”මම මේකෙම සේවකයෙක් එක්ක යාළුයි කියල මම මෙහේ එන එක නවත්තන්න එයා නොයෙක් දේ කළා. මේ පාර කරපු වැඬේ නං හරි ගියා” ඇය කීමෙන් ආරක්‍ෂක නිලධාරියාට තරු පෙනුණාලූ.