ගම්පහ දුම්රිය පොළෙන් කොළඹ දුම්රියට ගොඩ වූ සුරූපි තරුණියෝ දෙදෙනෙකි. දෙදෙනාම ජංගම දුරකතනයේ ‘ඉයර් පෝන්’ කනේ ගසාගෙන සිටියහ. මුහුණේ ඉරියව්වලින් පෙනුණේ ඔවුන් අමුතුම ලොවක සිටින බවය. දුම්රියද මිනිත්තු 45ක් පමාවී තිබිණි සෙනඟ ඇගිල්ලක් ගසන්නවත් ඉඩක් නොතිබිණ. කැලණිය දුම්රිය ස්ථානය පසුකරනවාත් සමග තරුණියක් කලබල වූවාය. අනේ මගේ සෙරෙප්පුවක් නෑ ඇය මහා හයියෙන් කීවාය. දුම්රියේ ගමන් ගත් මගියෝ ද කලබල වූහ. කකුළෙන් ගලවා ගත්තේ කෙසේ දැයි ඇතැමෙක් ඇසීය. හැමෝම සෙරෙප්පුව සොයන්නට වූහ. ඒ අතර එක් වයෝවෘද්ධ කාන්තාවක් ඇය වාඩිවී සිටි ආසනයට යට තිබී සපත්තුවක් දැක මෙයදැයි විමැසුවාය. ඔය මගේ සපත්තුව කියා ඇය වහා එය අතට ගෙන පයේ ලා ගත්තාය. කකුළේ දමාගෙන සිටි සෙරෙප්පුව එතැනට ගියේ කෙසේදැයි ඒ අසල සිටි කාන්තාවක එම තරුණියගෙන් විමසුවාය. ‘‘නෑ මට ඔය සෙරෙප්පු දෙක යාළුවෙක් තමයි තෑගි කෙළේ, මගේ උපන්දිනේට. අද තමයි ඉස්සෙල්ලාම දාගත්තේ කෝච්චියේ සෙනඟ වැඩි නිසා ඔවුනට පෑගී හීරී යනු ඇතැයි සිතා ගලවා අයිනෙන් තිබ්බා ”යැයි ඇය කියන විට දුම්රිය මැදිරියේ ගමන් ගත් අයට සිනහව නවත්වා ගැනීමට බොහෝ වේලාවක් ගතවිය.