චින්ග්රායිහිදීය (රොයිටර්)

උතුරු තායිලන්තයේ චින්ග් රායි පළාතේ තාම් ලුවාං ගල් ගුහාවේ සති දෙකකට කාලයක් සිර වී සිට ජීවිත ගලවාගත් දරුවන්ට තවත් අභියෝගයකට මුහුණ දීමට සිදුව තිබේ. 

දරුවන් 12 දෙනා සහ ඔවුන්ගේ පුහුණුකරු මුදා ගැනීමේ මෙහෙයුම් ආරම්භ වූයේ ඉරිදා (8) දිනයේදී වන අතර එම මෙහෙයුම් අවසන් වූයේ අඟහරුවාදා (13)ය. දෙස් විදෙස් කිමිදුම්කරුවන් 90ක් ඇතුළු දැවැන්ත බේරාගැනීමේ කණ්ඩායමක සාර්ථක වෑයමකින් අනතුරුව දරුවන් සියලු දෙනා සහ ඔවුන්ගේ පුහුණුකරු බේරාගැනීමට හැකිවිය.

ප්‍රතිකාර සඳහා රෝහල් ගත කළ දරුවන් සියලු දෙනා සහ පුහුණුකරු නිරෝධායනය කරන ලද අතර ඔවුන්ට තවත් සතියක් රෝහල් ගතව නේවාසික ප්‍රතිකාර ලැබීමටත් තවත් මසකට ආසන්න කලයක් නිවසට වී සිටීමටත් සිදුව ඇතැයි තායිලන්ත සෞඛ්‍ය බලධාරීහු පවසති.

ඔවුන් ගල් ගුහාවේ ගත කළ කාලය, එහිදු ඇති වූ පීඩනය අවදානම් සහගත තත්ත්වයක් බැවින් සාමාන්‍ය ජීවිතයට පැමිණීම සඳහා ඔවුන්ට ප්‍රමාණවත් කාලයක් ලබාදිය යුතු බව තායිලන්ත මෙන්ම විදෙස් සෞඛ්‍ය විශේෂඥයන් ද පෙන්වා දී තිබේ. ඒ අනුව ඔවුන්ගේ අනාගත සෞඛ්‍ය තත්ත්වය සලකා බලමින් දරුවන් 12 දෙනා සහ ඔවුන්ගේ පුහුණුකරු සතියක කාලයක් රෝහලේ තබා ගැනීමටත් මසකට ආසන්න කාලයක් නිවසේ තබාගනිමින් ඔවුන්ට පහසුකම් සැපයීමටත් කටයුතු කරන බව තායිලන්ත සෞඛ්‍ය බලධාරීහු ප්‍රකාශ කරති. 

දරුවන්ට පෙර පැවැති තත්ත්වයට පැමිණීම සඳහා කාලය සහ දරුවන්ගේ පෞද්ගලිකත්වය ආරක්ෂා කරමින් ඊට ඉඩ සලසන්නැයි තායිලන්ත අගමැති ප්‍රායුත් චාන් ඕචා එරට බලධාරීන්ට උපදෙස් දී ඇත. 

“දරුවන්ට කරදර නොකරන එකම විදිය ඔවුන්ට ඉගෙන ගැනීමට ඉඩ දීම” යැයිද ශ්‍රී ලංකාවේ සංචාරයක නිරත වීමට පෙර මාධ්‍යවේදීන් හමුවේ තායිලන්ත අගමැතිවරයා පැවැසීය.  

055