දකුණු කොරියානු නිලධාරියෙකු උතුරු කොරියානු හමුදා විසින් වෙඩිතබා මරා පුළුස්සා ඇතැයි දකුණු කොරියානු ආරක්ෂක අමාත්‍යාංශය පවසයි.

ධීවර දෙපාර්තමේන්තුවේ සේවය කළ එම නිලධාරියා 47 හැවිරිදි දෙදරු පියෙකි.

දේශ සීමාව අසල මුර සංචාරක බෝට්ටුවකින් ගමන් කරමින් සිටියදී ඔහු අතුරුදන්වී ඇති අතර පසුව උතුරු මුහුදේ තිබී ඔහුගේ සිරුර හමුවී ඇත.

උතුරු කොරියානු සොල්දාදුවන් ඔහුට වෙඩි තබා පසුව ඔහුගේ සිරුරට තෙල්වත්කර ගිනිතබා ඇතැයි සෝල් නුවර බලධාරීහු පවසති.

ඔවුන් පවසන්නේ එය කොරෝනා රෝගය පැතිරීම වැළැක්වීම සඳහා අනුගමනය කළ පියවරක් බවට විශ්වාස කරන බවයි.

කෙසේවුවද මේ සම්බන්ධව උතුරේ බලධාරීන් අදහස් දක්වා නොමැත.

කොරෝනා පැතිරීමත් සමඟ දෙරට අතර දේශසීමා ආරක්ෂක විධි විධාන තරකර තිබිණි.

කොවිඩ් - 19 රෝගය ව්‍යාප්ත වීම වැළැක්වීම සඳහා උතුරට ඇතුළුවන්නන්ට වෙඩි තබා ඝාතනය කිරීමේ ප්‍රතිපත්තියක් අනුගමනය කරන බව පෙනෙන්නට තිබේ යැයි දකුණේ බලධාරීහු පවසති.

උතුරු කොරියානු හමුදා දකුණේ වැසියෙකු වෙඩිතබා ඝාතනය කළ දෙවන අවස්ථාව මෙය වේ. 

2008 වසරේ ජූලි මාසයේදී ඔවුහු කුම්ගාං කන්දේදී සංචාරකයෙකු ඝාතනය කළහ.

(බීබීසිඇසුරිණි - 085)