මව්බිම ත්‍රස්තවාදයෙන්, පාතාල ක්‍රියාකාරකම්වලින්, සොරබියෙන්, කප්පම්කරුවන්ගෙන්, මත්ද්‍රව්‍ය ජාවාරම්කරුවන්ගෙන්, කාන්තා හා ළමා හිංසනයෙන් තොර සුරක්‍ෂිත රටක් කරන්නට අවශ්‍ය රාජ්‍ය ආරක්‍ෂක යාන්ත්‍රණය යළි ශක්තිමත්ව ගොඩනගවා යැයි අභිනව ජනාධිපති ධුරන්ධර ගෝඨාභය රාජපක්‍ෂ මහතා සිය ධුරයෙහි දිවුරුම් දෙමින් ජාතිය අමතා කළ කතාවෙන් සඳහන් කළේය.
සිය දිවුරුම් දීමේ උත්සවය පැවැති අනුරාධපුර රුවන්වැලි මහ සෑ රඳුන් අභිමුවේදී ජාතිය අමතා කළ පළමු කතාවෙන්ම පාතාලය මෙන්ම කප්පම්කරුවන් පිළිබඳව මතක් කර දුන්නේ එලෙසිනි.
“දැන් අයියලා ඔක්කෝම හෙල්ලිලා ඉන්නේ. නටලා ඉවරයි. දැන්වත් අපිට නිදහසේ ඉන්න පුළුවන් වෙයි.”
නව ජානාධිපතිවරයාගේ එම ස්ථාවරය දැඩි ලෙස හිතට කාවැදී ඇති හංවැල්ල ප්‍රදේශයේ ව්‍යාපාරිකයකු එසේ කීවේ දැන් ඔය පැත්තේ අලුත් තත්ත්වය කොහොමදැයි අප ඇසූ පැනයට පිළිතුරු වශයෙනි.
හංවැල්ල පොලිස් බලප්‍රදේශයේ අැඹුල්ගම, හබරකඩ, ජල්තර, ජයමාවත සහ රණාල ආදී ප්‍රදේශ කේන්ද්‍ර කරගනිමින් ආයුධ සන්නද්ධ පාතාල කල්ලි දෙකක් අතර බලය තහවුරු කරගැනීමේ දැවැන්ත අරගලයක නිරත පුද්ගලයන් නිසා ප්‍රදේශවාසීන් මුහුණ දී ඇත්තේ දැඩි බියජනක අසීරුතාවකටය. භීතියකටය. සිය මැර බලය පතුරවමින් ප්‍රදේශයේ ව්‍යාපාරිකයින්ගෙන් කප්පම් ඉල්ලන මෙම පිරිස එය ඉටු නොවුණහොත් රිටන් එක දෙන්නේ කඩු කිණිසිවලිනි. මෙනිසා දැන් ව්‍යාපාරිකයින් පිරිසක් තම ගම් බිම් අතැර ගොස් ඇති බවට ද අනාවරණය විණි.
කඩුවෙල, හංවැල්ල වැනි ප්‍රදේශවලට පාතාලය අලුත් දෙයක් නොවේ. පාතාලයේ ගෝඩ් ෆාදර්ලා වැඩි දෙනකු බිහිවී ඇත්තේ කඩුවෙල අවටිනි. මේ වනවිට ඔවුන් නිහඬව ගොසිනි.
කරාටේ ධම්මික, කඩුවෙල වසන්ත, සමයං ඒ ප්‍රසිද්ධ පාතාලයන්ගේ නම් කිහිපයකි. ලොක්කෝ නිහඬව ගියකල දැන් සොක්කෝ කරළියට විත් රඟන්නට ගෙන ඇත්තේ අයියාගේ තැන දැන් මල්ලී ගත යුතුය යන්න හඟවමිනි. දැන් දැන් හංවැල්ල අවට හොල්ලන්නේ මේ සොක්කන්ය.
මාකඳුරේ මධුෂ් මෙන්ම අංගොඩ ලොක්කා යනු කවුරුන්දැයි ඔබට හඳුන්වාදිය යුතු නැත. මාකඳුරේ මධුෂ් මේ වනවිට අපරාධ පරීක්‍ෂණ දෙපාර්තමේන්තුවෙත් අංගොඩ ලොක්කා ඩුබායි රාජ්‍යයෙත් පසුවෙති. අංගොඩ ලොක්කාගේ හිසරදය වී තිබුූ රණාලේ සමයං ඇතුළු පිරිසකට යළි නොඑන්නම වැඩේ දෙන්නට මධුෂ් පියවර ගත්තේ ඔහු ඩුබායි රාජ්‍යයේ සිටියදීය.
කළුතර එතනමඩල ප්‍රදේශයේදී බන්ධනාගාර බස් රථය තුළදී අවසන් ගමන් ගිය රණාලේ සමයංගේ ප්‍රධාන ගෝලයන් දෙදෙනා වන ඌරුජුවා සහ ඉන්ද්‍රා තම නායකයාගේ අඩුව පුරවන්නට සූදානම් වී තිබිණි. එහෙත් ඔවුන් ප්‍රදේශයේ ජනතාවට මෙතරම්ම පීඩාවක් එල්ලකරාවි යැයි කිසිවකුත් නොසිතන්නට ඇත. රණාලේ සමයං නොහොත් උඳුගොඩ පතිරැන්නැහැලාගේ අරුණ උදයකාන්ත පතිරණ යන අය ද හංවැල්ල පොලිස් බලප්‍රදේශයේ කප්පම් ඔස්තාර් කෙනෙකුව සිටි බව එම පෙදෙසේ ජනතාව පවසති.
සමයං ඝාතනය වන්නේ ඉකුත් 2017 වර්ෂයේ පෙබරවාරි මස 27 වැනිදාය. එතැන් පටන් ඔහුගේ රාජධානිය අතට ගත්තේ සමයන්ගේ රියැදුරා ලෙස කටයුතු කළ මාඹුලගේ දිනෙත් මෙලාන් මාඹුල නොහොත් ‘ඌරුජුවා’ සහ සමයංගේ සමීපතම ගෝලයා වූ ඉඳුනිල් වජිර කුමාර නොහොත් අංකුඹුරේ ඉන්ද්‍රාය. සමයං ඝාතනය වී වසරක් ඉක්ම යාමට මත්තෙන් ඉන්ද්‍රාත් ඌරුජුවාත් ජම්මන්තර වෛරක්කාරයින් වන්නේ කප්පම් සිද්ධියක් හේතුවෙනි.
ඌරුජුවා මුලින්ම බන්ධනාගාර ගත වෙන්නේ 2015 වර්ෂයේදී රණාලේ චාමර කපා කොටා ඝාතනය කිරීම ගැනය. ඔහු සමඟ සැකකරුවන් අට දෙනකු රක්‍ෂිත බන්ධනාගාර ගත වූ අතර නඩුව සඳහා කඩුවෙල අධිකරණය වෙත බන්ධනාගාර නිලධාරීන් බාරයේ මාංචු සහිත වැලේ මොවුන් රැගෙන එන අවස්ථාවේදී පිටතින් පැමිණි පුද්ගලයෙක් වෙඩි ප්‍රහාරයක් එල්ල කළේය. එම වෙඩි ප්‍රහාරය එල්ල වූයේ රණාලේ සමයං වෙතය. එහිදී තුවාල ලැබූ ඌරුජුවාත්, සමයනුත්, චමියාත් නවගමුව රෝහල වෙත රැගෙන එන්නේ ප්‍රතිකාර සඳහාය.
2016 වර්ෂය වනවිට කඩුවෙල නවගමුව පොලිස් ස්ථානය වෙත අලුත් ස්ථානාධිපතිවරයකු පැමිණ වැඩ භාරගෙන තිබිණි. අලුත් ලොක්කා අමාරුකාරයෙක්. සමයංගේ හිතවතෙකු වූ ‘කළු සාගර’ වහාම චමින්දව රැගෙන ගොස් මිරිහාන පොලිසියටත් උෟරුජුවා බන්ධනාගාරයටත් භාරකළේය. උෟරුජුවා නැවත බන්ධනාගාර ගතවී මාස හයක් ගත වීමට මත්තෙන් සමයං ඝාතනයට ලක්විය. එතැන් පටන් උෟරුජුවා තම ව්‍යාපාරය වූ කප්පම් ගැනීම ආරම්භ කළේය. විශේෂිත සිදුවීම නම් ඔහු මේ කප්පම් ඉල්ලන්නේ බන්ධනාගාරයේ සිටියදීම වීමය.
2016 දී බන්ධනාගාරයට යන උෟරුජුවා තවමත් සිටින්නේ බන්ධනාගාරය තුළය. එහෙත් ඔහු ජංගම දුරකථනය තම මෙහෙයුම් ආයුධය කොටගෙන හංවැල්ල ආශ්‍රිත ප්‍රදේශවල ව්‍යාපාරිකයින්ගෙන් කප්පම් ඉල්ලමින් සිටින බව කියති. මේ ගැන විවිධ අය විවිධ කතා කියා සිටියත් සත්‍යය සොයා බලා මේ පාතාලය මැඩලීම බලධාරීන්ගේ වගකීම බව අපි සිතමු.
අපරාධ නිවාරණ කොට්ඨාසය ඉකුත් 10 වැනිදා එම ප්‍රදේශවල සිදුකළ සෝදිසි මෙහෙයුම් කිහිපයකදී ඌරුජුවාගේ කප්පම් කල්ලියේ දුරකථන සහචරයන් දෙදෙනෙකු අත්අඩංගුවට ගෙන තිබිණි.
පාතාල ප්‍රහාරයකින් ඉකුත් සැප්තැම්බර් මස 15 වැනිදා ඇඹුල්ගම ප්‍රදේශයේදී ඉන්ද්‍රාටත් ඔහුගේ ගෝලයකු වූ සුරේෂ් රුවන් රණසිංහ නොහොත් ‘චූටි මල්ලි’ යන අයට ප්‍රහාරයක් එල්ල කර ‘චූටි මල්ලි’ යන අයව සදහටම පරලොව යවා ඉන්ද්‍රා ඔත්පළ කර ඇඳට වට්ටා දමනු ලැබීය.
රණාල ප්‍රකට ව්‍යාපාරික ආයතනයක් දින දෙකක් වසා දමන්නට ඉකුත් දිනක සිදුවූයේ මැර ක්‍රියාකලාපය හේතුවෙනි. එම ආයතනයට ලොරි රථ යොදවා සිටි ව්‍යාපාරිකයකුගේ ලොරි වෙනුවට තම ලොරි එහි සේවයට ගන්නා ලෙසට මෙම පාතාල නායකයකු අදාළ ආයතනයේ පරිපාලනයට බල කර තිබිණි.
ටෙන්ඩර් පටිපාටියට අනුව ලොරි රථ යෙදවීම සිදුකර තිබුණ ද මෙම මැරකම් හමුවේ පරාදවීමට එම සමාගමට සිදුවිය. මේ පිළිබඳව පොලිසියට පැමිණිලි කළ අදාළ ව්‍යාපාරිකයාට එකී කල්ලිය සංග්‍රහ කරන්නේ කඩු පහර කිහිපයකින් ඇඟපත කපාකොටා දමාය.
‘දැන් ප්‍රදේශයේ ව්‍යාපාරිකයෝ ගම අතහැරලා යනවා.’ මේ පිළිබඳව අවධානය යොමුකරන ලෙස දන්වමින් ප්‍රදේශවාසීන් ජනාධිපති කාර්යාලය වෙත යැවූ ලිපිවල සඳහන් වෙයි.
සියල්ල එසේ සිදුවෙද්දී අලුත් බලාපොරොත්තු, අලුත් හැඟීම් අතුරින් අභිනව ජනාධිපතිවරයකු පත්වෙයි. දැන් දැන් හංවැල්ල ප්‍රදේශයේ ජනතාවගෙන් ලැබෙන ආරංචි අනුව නම් අයියලා සයිලන්ට් වී ඇති හැඩකි. සද්දේ නවතා දමා ඇති හැඩකි.
කෙසේ වෙතත් මත්ද්‍රව්‍ය, පාතාලය මර්දනය කිරීම සඳහා ජනාධිපතිවරයා ශ්‍රී ලංකා යුද හමුදාව වෙත වගකීම භාරදී ඇති බවට ද අරංචි මාර්ග පවසයි. විය යුත්තේ එපමණකි. සෙල්ලම් දමමින් කප්පම් ගන්නටත් දුරකථනයෙන් තර්ජනය කර අහිංසක ජනතාව බිය වද්දන්නටත් මේ කෙරුමන් යැයි කියාගන්නා උන්ට නිසි දඬුවම ක්‍රියාත්මක විය යුතුමය.
එය හංවැල්ලට පමණක් නොව මුළු මහත් රට තුළම සිදුවිය යුතු ක්‍රියාදාමයකි. රටක් සංවර්ධනයට පාතාලය අවශ්‍යද? කිසිසේත්ම නැත. රටක ජනතාවට සමකාමීව තම ජීවන කටයුතු කරගෙන යාම සඳහා සුදුසු පරිසරයක් බිහිකිරීම රටේ පාලක පක්‍ෂය විසින් සිදුකළ යුත්තකි. හෙටින් උදාවන දිනය ඒ නායකත්වය යටතේ සිදුවෙතැයි අපි අපේක්ෂා කරමු.
නිමන්ති රණසිංහ
