මම එක දවසක් රූපවාහිනී යන්ත්‍රයක් මිලදී ගැනීම සඳහා ඒවා විකුණන සාප්පුවකට ගියෙමි. එහි සිටි සේවක සේවිකාවන්ට ඒවා ගැන හොඳ දැනීමක් නොතිබුණි. ඒවා උස්සා ගෙනවිත් ක්‍රියාකර පෙන්වීමේ දක්ෂතාව ඔවුන්ට නොතිබුණි. වරද්ද වරද්දා එහෙන් මෙහෙන් වයර් සම්බන්ධ කර රූපවාහිනිය යන්තම් ක්‍රියාකරවා පෙන්වීමට ඔවුහු සමත් වූහ. මෙසේ වන්නේ සේවකයින්ගේ කාර්යසූර බවක් නොතිබීමයි. අඩු පඩියට වැඩට ගත්තත් කාර්යය හරියට ඉටු නොවේ. හෝටල් හෝ වෙනත් ආයතනවලට ද මෙය එක​ සේ බලපායි.  


ඉහත සඳහන් අවස්ථාවේදී මට එක වරටම මතක් වුණේ එක්තරා තරුණයෙකි. ඔහුට විදුලි කාර්මික වැඩ, පයිප්ප වැඩ, ගෙවත්තේ වැඩ, බර ඉසිලීම, උඩට නැගීම ආදී නොයෙක් දේ ඉතා දක්ෂව කිරීමේ හැකියාව තිබුණි.  


ආයතනයක සේවයට ගත යුත්තේ එවැනි අයය. බලවත් කුජ දහයේ සිටීම බොහෝ කාර්යයන්හි දක්ෂයකු වීමට හේතුවේ. කම්මැලිකමක් ඇති නොවේ. කොතරම් වැඩ කළත් ඇතිවීමක් නැත. ඔහු ඉහළ වැටුප් සොයා යන්නකු විය හැකිය. එහෙත් එයින් ආයතන අයිතිකරුට පාඩුවක් ඇති නොවේ. කුමන විදියේ වැඩකට සේවකයකු ගත්තත් ඔහුගේ හඳහනේ බුධ බලවත්ව තිබීම බුද්ධිමත්ව කටයුතු කිරීමේ හැකියාව ලබාදෙයි. එමෙන්ම රවි, ගුරු යන ග්‍රහයින් ද බලවත් වන තරමට හොඳය.


එහෙත් රවි උච්ච අයකු එනම් රවි මේෂ රාශියේ සිටින අයකු ඔබේ සේවකයකු වශයෙන් නොගැනීමට වගබලා ගන්න. රවි උච්ච වූ විට ඔහු ඔබට යටත් නොවනු ඇත. ඔහු කිසිවකුටත් හිස පහත් කිරීමට කැමැති ​නොවනු ඇත. ඔබටත් ඉහළින් කටයුතු කිරීමට ඔහු පෙළඹෙනු ඇත. (එහෙත් රවි උච්ච වීම ඉතා යහපත් දෙයකි. ඔවුහු නරක අය නොවෙති) ඔබේ ආයතනයට සේවකයින් ගැනීමේදී මෙම කරුණු ගැන සැලකිලිමත් වීම ඔබේත් ආයතන​යේත් දියුණුවට හේතු වනු ඇත.  


විවාහයේදී හඳහන් බැලීම ඉතා වැදගත්ය. අද සමාජයේ බොහෝදෙනා පුරුදු වී ඇත්තේ දෙදෙනාගේ පොරොන්දම් පමණක් බලා විවාහ සිදු කිරීමටය. මා බලා ඇති පොරොන්දම් දහස් ගණනකින් දහයකට අඩුවෙන් ශුභ වූ හඳහන් දෙකක් මට හමු වී නැත. මෙසේ ශුභ යයි කියන්නේ දහයකට වැඩියෙන් ශුභ වූ පොරොන්දම්ය. මෙයින් අදහස් කෙරෙන්නේ ඕනෑම දෙදෙනකුගේ පොරොන්දම් ශුභ වන බවය. පොරොන්දම් පමණක් බලා විවාහ වීමේ තේරුමක් නැති බව මෙයින් පැහැදිලි වේ. පොරොන්දම්වලින් සියයට කීයක් ශූභදැයි දැන ගැනීමට බොහෝදෙනා උත්සුක වෙති. පොරොන්දම් සියයට සියයක් ගැලපුණත් එවැනි තේරීමකින් විවාහ සාර්ථක වන්නේ නැත. ග්‍රහ පිහිටීම් ගැන අනිවාර්යයෙන්ම සොයා බැලිය යුතුය. විවාහ වන දෙදෙනාගේ හත්වැන්න ගැලපෙනවාදැයි පළමුව බැලිය යුතුය. ඊළඟට වෙනත් නොගැලපීම් ඇත්දැයි බැලිය යුතුය. කුජ සිකුරු, කුජ ශනි, කුජ කේතු, රාහුගේ නීච වීම, සිකුරුගේ නීච වීම ආදිය සැළකිල්ලට ගත යුතුය. සිකුරු නීච අයකුත් සිකුරු බලවත් අයෙකුත් විවාහවීම නරකය.  


කුජ ශනි යෝගය ඇති අයකුත් නැති අයකුත්, කුජ සිකුරු යෝගය ඇති අයකුත් නැති අයකුත් විවාහ වීම අනවශ්‍ය කරදර ඇති කරගෙන ජීවිත අඳුරට යොමුකර ගැනීමකි. විවාහයේදී බලවත්ම ග්‍රහයින් තුන්දෙනෙකුත් බලයෙන් අඩුම ග්‍රහයින් තුන්දෙනෙකුත් ඒ අතර මධ්‍යම ප්‍රමාණයේ බලවත් ග්‍රහයින් තුන්දෙනකුත් ඇත. 

 
1. කණ්ඩායම - රවි, කුජ, රාහු  
2. කණ්ඩායම - සිකුරු, බුධ, චන්ද්‍රයා  
3. කණ්ඩායම - ගුරු, ශනි, කේතු  


විවාහ විය යුත්තේ මේ කණ්ඩායම් ඇතුළතය. එක කණ්ඩායමකින් පිට අයකු හා විවාහ වීම හතේ බලය අඩු වැඩි දෙදෙනකු විවාහවීමකි. දෙදෙනාගේම හත්වැන්නේ සිටින ග්‍රහයින් සමාන බලවත්කමකින් සිටිය යුතුය. පළමු කණ්ඩායමේ ග්‍රහයින් ගේ බලය සමාන වුවත් රාහුගේ ක්‍රියාකාරිත්වයන් වෙනස් නිසා හතේ රවි හෝ කුජ සිටින කෙනකුට (වෙනත් ඕනෑම ග්‍රහයකු හතේ සිටින කෙනකුට) හතේ රාහු සිටින අයකු නොගැලපේ. හතේ රාහු සිටින අයකුට හතේ රාහු සිටින අයකුම ගැළපේ. වෙනත් විකල්ප නැත.  


සමහරු විවාහ වන්නේ තම අවශ්‍යතාවට වඩා මවුපියන්ගේ හා සමාජයේ අවශ්‍යතාවයටය. අවිවාහකව සිටීමෙන් දෙමවුපියන්ගෙන් ඇතිවන කරදරයෙනුත් සමාජයෙන් ඇති වන උපහාස අපහාස යනුත් වළක්වා ගැනීමට සමහරු විවාහ වෙති. මෙවැනි විවාහ සාර්ථක වන්නේ ද නැත.  

 

 


විශ්‍රාමලත් විදුහල්පති, ජ්‍යොතිර්වේදී  
එඩී කරුණාතිලක  
32, ගලවැටිමෝදර පාර, නල්ලූරුව, පානදුර.