ජපානයේ නරුහිතෝ අධිරාජයා මේ වසරේ වසන්තයේ දී අධිරාජ ධුරයට පත් වුවත්, එම ධුරයට පත්වීම සම්පූර්ණ කිරීම සඳහා තවත් එක් අපූරු චාරිත්‍රයක් ඉටු කිරීමට බැඳී සිටියි. ලීයෙන් තැනූ කුටියක් තුළ සූර්ය දේවතාවිය සමඟ රැයක් පහන් කිරීම යනුවෙන් එම චාරිත්‍රය හැඳින්වේ. දයිජෝසායි යනුවෙන් හැඳින්වෙන මෙම චාරිත්‍රය අමතෙරාසු ඔකිමාකි යනුවෙන් හඳුන්වන සූර්ය දේවතාවිය කේන්ද්‍ර කරගත්තකි. ජපානයේ සාම්ප්‍රදායික විශ්වාසය එම රජ පෙළපත සූර්ය දේවතාවියගෙන් පැවත එන බවයි. 

මෙම ඉපැරණි චාරිත්‍රය කොමියුනිස්ට්වරුන්ගේ මෙන්ම කිතුනු බැතිමතුන්ගේ ද දැඩි විවේචනයට ලක්වූවක් වන අතර චාරිත්‍රය සඳහා ජපන් යෙන් බිලියන 2.7ක් එනම් ඇමරිකන් ඩොලර් මිලියන 25ක් වැය වේ. මධ්‍යම රජය විසින් ගෙවන මෙම ගාස්තුවට එරෙහිව නඩු කිහිපයක්ම වැටී ඇත. දෙවන ලෝක යුද්ධයට පෙර සමයේ ජපානයේ පාසල් පෙළ පොත්වල සඳහන් වූයේ අධිරාජයා දේවතාවෙක් බවය. කටකතාවලින් කියැවුණේ අධිරාජයාට දේවතාවිය සමඟ විවාහක සම්බන්ධතා තිබෙන බවය. 

මෙම චාරිත්‍රයෙන් පසු අධිරාජයා හා හිරු දෙවියන් අතර සබැඳියාව සමරමින් ආහාරපාන බෙදා ගන්නා උත්සවයක් පැවැත්වෙන අතර මුළු චාරිත්‍රය සඳහාම විශාල මුදලක් වැය වෙන බැවින් අධිරාජයාට එය කිරීමට ඔතරම් අවශ්‍ය නම් එය ඔහුගේ පුද්ගලික මුදලින් කළ යුතු යැයි අධිරාජයාගේ බාල සොහොයුරු අකිෂිනෝ කුමරු ද චෝදනා කර සිටියි

.