බ්‍රිතාන්‍ය ජාතික යුවළක් විවේකී සංචාරයක් සඳහා වෙරළබඩ ගමනාන්තයක් සොයමින් සිටි අතර ඔවුන් තෝරාගත් නවාතැන වූයේ ටැන්සානියාවේ සැන්සිබාර් වෙරළේ නිවාඩු නිකේතනයකි.   


නොගැඹුරු ජලයේ කායැක් බෝට්ටු පදවමින් සිටියදී එය පෙරළීම නිසා ඔවුනට නොගැඹුරු දියේ දී මුහුදු පතුලේ සිටගන්නට විය. නැවත කෙළින් කරගත් බෝට්ටුවට බිරිඳ පහසුවෙන් ගොඩ වූ නමුත් සැමියාට එය අපහසු විය. වතුර ඉතා නොගැඹුරු වූ බැවින් සැමියාට බෝට්ටුවට ගොඩ වීම පවා අපහසු විය. දෙදෙනා මඳ දුරක් ගමන් කළ පසු සැමියා ඉතා අපහසුතාවකින් පෙළෙන බවක් පෙන්නුම් කළේය. කෙසේ හෝ දෙදෙනා නැවත නවාතැනට පැමිණීමට පෙර වෙරළේ මඳක් ගිමන් හරින්නට ද අමතක නොකළහ.   
නවාතැනට පැමිණි පසුවත් සැමියාගේ අපහසුතාව දිගින් දිගටම පවතින බව පෙනුණු අතර දිය නා ගත් ඔහු වායුසමීකරණය අසලට වී සිටියේ අධික රස්නයක් දැනෙන බව කියමිනි. සැමියා දිගින් දිගටම පැමිණිලි කරන්නට වූයේ ඔහුට විවේකයක් අවශ්‍ය බවත්, අත්වේදනා දෙන බවත් කියමිනි. සැමියා ඇඳේ වැතිරී සිටි අතරවාරයේදී ඔහුගේ යටි පතුලේ ඇනී තිබුණු මුහුදු ඉකිරි කටු කිහිපයක් බිරිඳගේ සූක්ෂම ඇසට හසු විය. එහෙත් වෛද්‍යවරයෙක් කැඳවනු පිණිස බිරිඳ කළ යෝජනාව නොසලකා හැරි ඔහුට වේදනානාශක පෙත්තක් දී බිරිඳ පිටතට ගියේ පොතක් කියවීම පිණිසයි.   


බිරිඳ නැවත නවාතැනට පැමිණෙන විට සැමියා යහනේම අවසන් ගමන් ගොස් තිබිණ. ඇය උදවු ඉල්ලා සිටි නමුත් වෛද්‍ය ප්‍රතිකාර පැමිණියේ විනාඩි 40ක් ද ඉක්මවීමෙන් පසුවයි. එහෙත් වෛද්‍යවරුනට කරන්නට කිසිවක් ඉතිරි වී නොතිබිණ. ඔහුගේ මරණයට හේතුව ලෙස කියැවුණේ මුහුදු ඉකිරි විස ශරීරගත වීමයි. 

 

 
අන්තර්ජාලය ඇසුරිනි.   
නිසංසලා දිසානායක