(මහේෂ් කිර්තිරත්න)

මාතලේ උකුවෙල වරකන්ද ප්‍රදේශයේ නිවසකට ඇතුළු වී රුපියල් 4,20,000 වටිනා රන් භාණ්ඩ සොරකම් කළ තරුණයන් දෙදෙනෙකු සහ තරුණියක් අද (10) අත්අඩංගුවට ගත් බව පොලිසිය කියයි.

භාණ්ඩ සොරකමක් පිළිබඳව මාතලේ පොලිසියේ අපරාධ විමර්ෂන අංශයට ලද පැමිණිල්ලක්  අනුව කරන ලද  විමර්ෂනයකදී සිද්ධියට අදාල සැකකරුවන් අත්අඩංගුවට ගෙන ඇත.

අත්අඩංගුවට ගත් පිරිස පාසල් සිසුන් බව පොලිසිය සඳහන් කළේය.

අත්අඩංගුවට ගත් එක් සැකකරුවෙකුගේ මවක් හිතවත් නිවසකින් පැළඳීම සඳහා නිතර රන් භාණ්ඩ හුවමාරු කර ගන්නා බවත් එම නිවසින් මොවුන් මෙම රන් භාණ්ඩ සොරකම් කර ඇති බවත් පසුව පාසලේ සිටින මිතුරියකට එම රන් භාණ්ඩ සඟවා තබා ගැනීමට ලබාදී ඇති බවත් පොලිසිය සිදුකළ විමර්ෂන වලදි අනාවරණය වී තිබේ.

රන් භාණ්ඩ සඟවා තබා ගැනීමට දුන් මිතුරියගේ මව විසින්  රන් භාණ්ඩයක් නුවර වෙළඳ සැලකට උකස් කර තිබියදී  සොයාගත් ගත් බවද පොලිසිය සඳහන් කළේය.

ඒ අනුව සැකරුවන් සොරකම් කළ භාණ්ඩ අතර පවුම් 4 ක් බර රන්මාලයක්,පවුම් එක හමාරේ වලලු 02 ක්,පවුම් එකක පෙන්ඩනයක් පොලිසිය විසින් සොයාගෙන තිබේ.

සැකකරුවන්  මාතලේ මහෙස්ත්‍රාත්  අධිකරණයට ඉදිරිපත් කිරීමට නියමිත බවද පොලිසිය කියයි.