(කේෂර ගුණතිලක)

අම්පාර-සියඹලාණ්ඩුව මාර්ගයේ කන්දඋඩපංගුව 6 කණුව අසලදී සිදුවූ අනතුරකින් යතුරුපැදිකරුවෙකු අද (27) මිය ගිය බව ගොවිඳුපුර පොලීසිය පවසයි.

මෙලෙස මියගොස් ඇත්තේ සියඹලාණ්ඩුව කන්දඋඩපංගුව 6 කණුව අසල පදිංචි ටී.එම් නිරෝෂන් දිල්හාර (15) නැමති පාසල් ශිෂ්‍යයෙකි.

ඔහු තවත් අයෙකු සමඟ යතුරුපැදියකින්  6 කණුව අසල පිහිටි නල ළිඳකට වතුර ගෙන ඒමට යමින් සිටියදී පිටුපසින් පැමිණි අම්පාර සිට කොළඹට ධාවනය වෙමින් තිබූ පෞද්ගලික බස් රථයක් යතුරුපැදියේ ගැටී ඇත.

එම අනතුරෙන් තුවාල ලැබූ පැදිකරු හා පසු පැදිකරු සියඹලාණ්ඩුව මූලික රෝහලට ඇතුලත් කර වැඩිදුර ප්‍රතිකාර සඳහා මොනරාගල දිස්ත්‍රික් මහ රෝහලට මාරුකර ප්‍රතිකාර ලබමින් සිටියදී මියගොස් ඇත.

බස්රථයේ රියැදුරු පොලීසිය මඟින් අත්අඩංගුවට ගෙන අද (27) සියඹලාණ්ඩුව මහේස්ත්‍රාත් අධිකරණයට ඉදිරිපත් කිරීමට නියමිතය.