ක.ග කරුණාරත්න
 
සිංහල අලුත් අවුරුද්දට පෙර දිනයේ (13) බිම ඇද වැටී හිසට තුවාල සිදුවූ බව පවසා රෝහල් ගත කිරීමෙන් අනතුරුව මියගිය සිවිල් ආරක්ෂක භටයාගේ මරණය පහරදීමකින් සිදුවී ඇතැයි අනාවරණය වීමෙන් පසු ඔහුගේ බිරිය අද (16) සැකපිට අත්අඩංගුවට ගත් බව අරලගංවිල පොලීසිය කියයි. 

මෙලෙස මිය ගොස් ඇත්තේ දම්මින්න ප්‍රදේශයේ පදිංචි 37 හැවිරිදි සුරවීර ආරච්චිලාගේ විමල් කුමාර නැමැති 37 හැවිරිදි දෙදරු පියෙකි.

මොහු ඉකුත් සෙනසුරාදා (13) සිය නිවසේ මිදුලේදී පය ලිස්සා ගොස් බිම ඇද වැටී අසල තිබූ අත්තිවාරමක වැදීම නිසා හිසට තුවාල සිදුවූ බව ප්‍රකාශ කර ඔහුගේ බිරිය විසින් ඊට පසු දින (14) පොළොන්නරුව මහ රෝහලට ඇතුළත් කර ඇත.

ඉන් අනතුරුව රෝගියා වැඩිදුර වෛද්‍ය ප්‍රතිකාර සඳහා අනුරාධපුර මහ රෝහලට මාරු කර යවා ඇති අතර මියගොස් තිබේ.

මිය ගිය පුද්ගලයාගේ මව මේ මරණය තමන්ට සැක සහිත බවට අරලගංවිල පොලිසියට කරන ලද පැමිණිල්ලකට අනුව සිදුකළ විමර්ශන වලදී අනාවරණය වී ඇත්තේ මරණකරුගේ බිරිය විසින් පොල්ලකින් පහරදීම නිසා තුවාල ලබා තිබෙන බවයි.

ඒ සම්බන්ධයෙන් මූලික මහේස්ත්‍රාත් පරීක්ෂණය අද (16) පැවැත්වීමට නියමිතය.