(ජයන්ත සමරකෝන්)

වැලිකඩ බන්ධනාගාරයේ රෝහල කුඩු පුරයක් හා ජංගම දුරකතන මධ්‍යස්ථානයක් බවට පත්ව ඇතැයි එම රෝහලේ ආරංචි මාර්ග සඳහන් කරයි.

මෙහි බන්ධනාගාර බුද්ධි අංශයේ වැටලීම් නිසි පරිදි ක්‍රියාත්මක නොවන බවටද චෝදනා ඇතැයි පැවැසේ.

සිරකරුවන් පමණක් නොව නිලධාරීන් මෙන්ම ඇතැම් වෛද්‍යවරුන් පවා බන්ධනාගාර රෝහල තුළට නීතිවිරෝධී ද්‍රව්‍ය හා උපකරණ සපයන බවටද ආරංචි පැතිර යමින් ඇති බවටද වාර්තාවේ.

ඉකුත් දා වෛද්‍යවරයෙකු රෝහළ තුළට මත්පැන් බෝතලයක් රැගෙනවිත් ඇති බවටද චෝදනා එල්ල වී තිබිණි.

රෝහල තුළ නීතිවිරෝධී ද්‍රව්‍ය හා උපකරණ අලෙවිය ඉහළ යාම හේතුවෙන් ඒවායේ මිලද විශාල ලෙස අඩුවී ඇතැයි දැනගන්නට තිබේ.

ඒ අනුව ජංගම දුරකතනයක් රුපියල් 50,000 සිට රුපියල් 35,000 දක්වාත්, දුම්කොලයක් රුපියල් 5,000 සිට 3,000 දක්වාත්, කුඩු පැකට්ටුවක් රුපියල් 500 සිට රුපියල් 100 දක්වාත් අඩුවී ඇතැයිද පැවැසේ.

මේ පිළිබඳව අධිකරණ හා බන්ධනාගාර අමාත්‍යාංශයේ උසස් නිලධාරියෙකුගෙන් කළ විමසීමේදී ඔහු පැවැසුවේ බුද්ධි අංශ විසින් වැටලීම් කර අදාළ නීතිවිරෝධී ද්‍රව්‍ය හා උපකරණ අත් අඩංගුවට ගත් නමුත් ඇතැම් නිලධාරීන් හා ඇතැම් වෛද්‍යවරුන්  මෙම ද්‍රව්‍ය ඇතුළට රැගෙන එන බවට චෝදනා පවතින බවත් කොපමණ වැටලීම් කළද මෙම තත්ත්වය මැඩ පැවැත්වීය නොහැකි වී ඇති බවත්ය.