(කාංචන කුමාර ආරියදාස)


චෝදනා කිහිපයක් නිසා දඹුල්ල මහනගර සභාවේ වැඩ පාලකවරයෙක් නගර සභාවේම   වෙනත් ස්ථානයකට ස්ථාන මාරු කිරීමේ සිද්ධියක් මුල් කරගෙන දඹුල්ල මහනගර සභාවේ සේවකයන් පරිපාලකයන් දේශපාලන අධිකාරිය අතර දැඩි අර්බුදකාරී තත්ත්වයක් අද (6) මතුවිණි.

දඹුල්ල මහනගර සභාවේ මාසික මහා සභා රැස්වීම අද  දඹුල්ල බස් නැවතුම්පළ උඩු මහලේ පිහිටි රැස්වීම් ශාලාවේ දී පැවැත්වීමට සූදානම් කර තිබියදී කම්කරු සේවකයෝ පිරිසක් විරෝධතා බැනර් පෝස්ටර් ප්‍රදර්ශනය කරමින් නගර සභා කාර්යාලයට පිවිසෙන තරප්පු  පෙළ දෙපස විරෝධතාවක නිරතව සිටියහ.

මෙම විරෝධතාකරුවන් කියාසිටියේ මීට දින හතරකට ඉහතදී තම වැඩ පාලකවරයා වූ ඡන්න ඕපාත නැමැති අයෙකු දිගම්පතහ කසළ අංගනයේ වැඩ පාලකවරයා ලෙස ස්ථාන මාරු කිරීමේ හේතුවෙන් තම සේවකයන්ට නිසි ලෙස වැඩ බෙදාදීම් වැඩ අධික්ෂණය සිදු නොවන නිසා ගැටලු  සහගත තත්ත්වයකට පත්ව තිබෙන බවයි.

එම නිසා ස්ථාන මාරු කරනු ලැබූ වැඩ පාලකවරයා නැවත දඹුල්ල නගරයේ පිරිසිදු කිරීම් කටයුතු වල වැඩ පාලකවරයා ලෙස පත් කරන ලෙස ඔවුහු ඉල්ලා සිටිති.

දේශපාලන බලපෑම් මත මෙම චන්න  ඕපාත නැමැති වැඩ පාලකවරයා ස්ථාන මාරු කර තිබෙන බවත් එම සේවකයා නොමැතිව කුණු කසළ ඉවත්කිරීමේ විශාල ගැටලුවකට සේවකයන් පත්ව තිබෙන බවද ඔවුහු විරෝධතාවේදී පැවසූහ.

පසුව විරෝධතාවය අතරින් දඹුල්ල මහනගර සභාවේ එක්සත් ජාතික පක්ෂය නියෝජනය කරන මන්ත්‍රීවරුන් සහ මන්ත්‍රීවරියන් සභා ගර්භයට පැමිණීම සිදු කර මේ දී මන්ත්‍රීවරියන් දෙදෙනෙකු වන ෂෙරින් අබේසිංහ   සහ  නිලක්ෂි  ජයසුන්දර යන දෙදෙනා දැඩි වාග් ප්‍රහාරයක් එල්ල කරමින් සභාවට පැමිණියහ.

එක්සත් ජාතික පක්ෂය නියෝජනය කරන මෙම මන්ත්‍රීවරියන් දෙදෙනා දැඩි ලෙස කියා සිටියේ මෙම වැඩ පාලකවරයා සේවකයන්ට දැඩි දඬුවම් ලබාදෙන බවත් දැඩි පාලනයක් ගෙන ඉන්න  බවය එමෙන්ම නගරයේ ඇති වටිනා කියන හිස් භූමි කුඩා අට්ටාල සදා කුලියට ලබා දීම ආදී වැරදි කරුණු රැසක් පැවසූ ඔවුන් කියා සිටියේ මෙම විරෝධතාවය දඹුල්ල මහ නගර සභාවේ මහජන සෞඛ්‍ය පරීක්ෂක ප්‍රියන්ත මහතා සහ තවත් කීප දෙනෙක්ගේ ඉතා සූක්ෂම සිද්ධියක් බව ය.

මෙම සේවකයන්ගේ කටට මුකවාඩම් දමා ගෙනවිත් දමා ඇති බවද කියන්නට වුවාය .පසුව විරෝධතාවය අතරින් දඹුල්ල මහ නගර සභාවේ නගරාධිපති ජාලිය ඕපාත මහතා සභා ගර්භයට පැමිණීමට යමින් සිටියදී විරෝධතාකරුවන්ගෙන් කරුණු විමසන්නට විය.

ලැබුණු පැමිණිලි අනුව තමා නිවැරදි තීන්දුවක් ගත් බව නගරාධිපතිවරයා සඳහන් කළේය. එනම් සේවකයන් බඳවා ගැනීම සහ පාලනය කිරීම දැඩි අසීරු තත්ත්වය පත්ව තිබෙන   බව පැවසූ  නගරාධිපතිවරයා සඳහන් කළේ මෙම චෝදනාව එල්ල වී ඇත්තේ තමන්ගේ සහෝදරයකුට බවත් එබැවින්   නිසිලෙස  නිතිය ක්‍රියාත්මක කළ බවයි.

නගරයේ ජනතාව තමා වෙත භාරදුන් වගකීම නිසි ලෙස ඉටු කරමින් මෙම ප්‍රශ්නයට ද කඩමින් විසඳුමක් ලබාදීමට අවශ්‍ය පියවර ගන්නා බව නගරාධිපති ජාලිය ඕපාත මහතා පැවසීය.