(නිමල් ජයරත්න)

පොළොන්නරුව මඩකලපුව ප‍්‍රධාන මාර්ගයේ කුසුම්ගම ප‍්‍රදේශයේදී අද (17) ලොරි රථයක ඉදිරිපස ටයරයක් පුපුරා පාරෙන් ඉවතට පැන මාර්ගයේ නතර කර තිබූ වාහන පහක ගැටී සිදු වූ අනතුරකින් ත‍්‍රීරෝද රථයක සිටි පුද්ගලයකු බරපතල තුවාල ලබා පොළොන්නරුව මහ රෝහලට ඇතුළත් කළ බව පොළොන්නරුව පොලිසිය පවසයි.

වී පටවා ගත් ලොරියක් මනම්පිටිය ප‍්‍රදේශයේ සිට පොළොන්නරුව දෙසට ගමන් කරමින් තිබියදී ටයරය පුපුරා ගොස් සිදු අනතුරෙන් නවතා තිබූ ත්‍රීරෝද රථ දෙකක් , බස් රථ දෙකක් සහ යතුරුපැදියක ගැටී ඇති බව පොලිසිය සඳහන් කළේය.

ගල්ලෑල්ල කුසුම්ගම ප‍්‍රදේශයේ තේ පානය කිරීම සඳහා මෙම වාහන නතර කර ඇති අතර අනතුරෙන් ත‍්‍රී රෝද රථ දෙකකට සහ යතුරු පැදියට බරපතල හානි සිදුව ඇත.

අනතුරට සම්බන්ධ ලොරි රථයේ රියදුරු අත්අඩංගුවට ගෙන වැඩිදුර පරීක්ෂණ සිදු කරන බව පොළොන්නරුව පොලිසිය කියයි.

අනතුරට හේතුව ලොරි රථයේ කාර්මික දේෂයක් සහ අපරීක්ෂාකාරි රිය ධාවනය බවට සැකකරන බවත් මේ සම්බන්ධව පරීක්ෂණ පවත්වන බවත් පොළොන්නරුව පොලිසිය පැවැසීය.