(ඩී. ජී. සුගතපාල)
 
ගාල්ල හිරිඹුර ප්‍රදේශයේ ඉදිකරගෙන යනු ලබන පෞද්ගලික රෝහල් ගොඩනැගිල්ලකට සහ එහි යන්ත්‍ර සූත්‍රවලට ගිනි තබා රුපියල් කෝටි 18කට අධික අලාබයක් සිදුකළ පිරිසකගෙන් එක් සැකකරුවෙකු  අද  (31) අත්අඩංගුවට ගත් බව ගාල්ල පොලිසිය පැවසීය.
 
අත්අඩංගුවට ගත් සැකකරු හිරිඹුර ප්‍රදේශයේ පදිංචිකරුවෙකි.
 
ඩෙංගු රෝගය වැළඳීමෙන් අප්‍රේල් මස 4 සහ 12 යන දිනවලදී ප්‍රදේශයේ විසූ එකම පවුලේ කුඩා ළමයි දෙදෙනෙකු මියගිය බවත්, මදුරුවන් බෝවන්නේ මෙම ගොඩනැගිලි සහිත වැඩබිමෙන් බව පවසමින් පුද්ගලයින් පිරිසක් විරෝධතාවයක් පැවැත්වූ බවත්, ඔවුන් ගොඩනැගිල්ලට සහ යන්ත්‍රසුත්‍රවලට ගිනි තබා හානි කර ඇති බවත් එහි හිමිකරු පොලිසියට පැමිණිලි කර තිබිණි.
 
ඒ අනුව විමර්ශන පැවැත්වූ පොලිසිය සැකකරු අත් අඩංගුවට ගෙන ඇත.
 
සිද්ධියට සම්බන්ධ තවත් සැකකරුවන් පිරිසක් අත්අඩංගුවට ගැනීමට නියමිත බව පොලිසිය පැවසීය.