(බන්දු තඹවිට)
 
මතුගම සෞඛ්‍ය වෛද්‍ය නිලධාරී කොට්ඨාසයට අයත් මීගම ප්‍රදේශයේ තුනී ලෑලි කර්මාන්ත ශාලාවකින් කොරෝනා ආසාදිතයන් 12 දෙනෙකු හමුවීමත් සමග එම කර්මාන්ත ශාලාව වසා දැමීමට පියවර ගත් බව මතුගම පරිපාලන මහජන සෞඛ්‍ය පරීක්‍ෂක ජී.ඩී. ලයනල් මහතා පැවසීය.
 
එහි සේවකයන් සියලු දෙනා නිරෝධායනයට යොමුකළ බවත් එම පිරිසට අමතරව මතුගම ප්‍රදේශයේ ඇඟලුම් කම්හලකින් කොරෝනා ආසාදිතයන් දෙදෙනෙකු සහ යටදොලවත්ත ප්‍රදේශයෙන් ආසාදිතයන් 10 දෙනෙකු වාර්තාවූ බවත් ඒ මහතා කීය.
 
මතුගම වැලිපැන්න ප්‍රදේශයේ පසුගිය දිනකීපයෙදී කොරෝනා ආසාධිතයන් 65 දෙනෙකු හමුවිය.
 
එම ආසාදිතයන් හමුවූ වැලිපැන්න මුස්ලිම් පාර දින කීපයක් හුදකලා කර පසුගිය 19 වනදා සවස නැවත විවෘත කළේය. ඉන් අනතුරුව මතුගම අවට ආයතනවල සහ විවිධ ස්ථානවල පී.සී.ආර්. පරීක්ෂණ  මතුගම සෞඛ්‍ය වෛද්‍ය නිලධාරී කාර්යාලය මගින් සිදුකිරීමෙන් අනතුරුව ඊයේ දිනයේදී ආසාධිතයන් 24 දෙනෙකු වාර්තා වී ඇත.
 
මීගම තුනී ලෑලි කර්මාන්ත ශාලාවේ සේවකයන්ට අද දිනයේ පී.සී.ආර්. පරීක්ෂණ සිදුකිරීමට නියමිතය. මතුගම ප්‍රදේශයේ ආයතනවල සහ අහඹු ලෙස පී.සී.ආර්. පරීක්ෂණ සහ ක්ෂණික ප්‍රතිදේහ පරීක්ෂණ මතුගම සෞඛ්‍ය වෛද්‍ය නිලධාරී ගයාත්‍රි විතාන මහත්මිය සහ පරිපාලන මහජන සෞඛ්‍ය පරීක්‍ෂක ජී.ඩී. ලයනල් මහතාගේ අධීක්ෂණයෙන් සිදුකිරීමට කටයුතු සංවිධානය කර ඇත.