සිතුම් චතුරංග

වවුනියාව කුරුමන්කාඩු ප්‍රදේශයේ උපකාරක පංති සඳහා පැමිණෙන පාසල් සිසු සිසුවියන් හට උසුළුවිසුළු කරමින් මාර්ගයේ තනි රෝදයෙන් යතුරුපැදි ධාවනය කළ තරුණයින් සිව්දෙනකු අද (11) උදෑසන අත්අඩංගුවට ගත් බව වවුනියාව පොලිසිය කියයි.

කුරුමන්කාඩු උද්‍යාන මාර්ගයේ උපකාරක පංති සඳහා පැමිණෙන සිසුවියන්ට උසුළු විසුළු කරමින් අශෝභණ ලෙස හැසිරෙන තරුණයින් කණ්ඩායමක් පිළිබඳ වවුනියාව පොලිසිය වෙත ලැබුණ පැමිණිලි කිහිපයක් මත පොලිස් රථවාහන නිලධාරීන් සිදුකළ වැටලීමකදී සැකකාර තරුණයින් හා ඔවුන් පැමිණි නවීන පන්නයේ යතුරු පැදි හතරක් ද අත්අඩංගුවට ගත් බව පොලිසිය සඳහන් කරයි.

සවස් කාලයේ තරුණයින් පිරිස උපකාරක පංති අසලට පැමිණ මාර්ගය අවහිර කර තනිරෝදයෙන් යතුරුපැදි ධාවනය සිදුකරන බවත් එම හේතුවෙන් මාර්ගයේ ගමන් ගන්නා බොහෝ පිරිසක් කලක සිට අපහසුතාවට පත්ව ඇති බවට ද පැමිණිලි ලැබී ඇතැයි පොලිසිය සඳහන් කළේය.

තරුණයින් පිරිස අත්අඩංගුවට ගැනීමට පොලිසිය පැමිණෙන අවස්ථාවලදී ඔවුන් අතුරුමාර්ග වලින් පැන යන බවද කීය.

පොලිසිය පැවසූයේ අත්අඩංගුවට ගත් තරුණයින් පිරිස රාත්‍රී කාලයේ මුදලට යතුරුපැදි ධාවන තරගයේ යෙදෙන පිරිසක් බවටද සිදුකළ විමර්ශන වලදී තොරතුරු අනාවරණය විය.

අත්අඩංගුවට ගත් යතුරුපැදි සාමාන්‍ය යතුරු පැදියකට වඩා එන්ජින් ධාරිතාව වැඩි යතුරුපැදි බවද පොලිසිය අනාවරණය කළේය.

සැකකරුවන් වවුනියාව ප්‍රදේශයේ පදිංචි අවුරුදු 18 - 20 අතර වයසේ පසුවන්නෝ වෙති. 

සැකකරුවන් අන්තරායකාරී, අපරික්ෂාකාරී අයුරින් රියධාවනය යන චෝදනා යටතේ වවුනියාව මහෙස්ත්‍රාත් අධිකරණයට ඉදිරිපත් කිරීමට නියමිතය.