(කරන්දෙණිය එම්.සුසිල් ප්‍රියන්ත )

වතුගෙදර ආඳාදොළ ප්‍රදේශයේ සිය නිවසේ සිටි 10 හැවිරිදි හා 05 හැවිරිදි දියණියන් දෙදෙනෙකු අද (23 ) දහවල්  රැගෙන ගොස් කුරුඳුවත්ත ප්‍රදේශයේ මහ මග දමා ගිය ත්‍රීරෝද රථ රියදුරා අත්අඩංගුවට ගැනීමට පරීක්ෂණ ආරම්භ කළ බව අම්බලන්ගොඩ පොලිසිය කියයි.

මේ දියණියන් දෙදෙනාගේ මව අද (23)  ගමේ විහාරස්ථානයට දානය රැගෙන ගොස් සිටියදී නිවසේ සිටි දියණියන් දෙදෙනා මව සිටින තැනට රැගෙන යන්නේ  යයි කියමින් ත්‍රි රෝද රථ රියදුරෙකු විසින් ඔවුන් දෙදෙනා සිය රථයේ නංවාගෙන ගොස් අම්බලන්ගොඩ කුරුඳුවත්ත ප්‍රදේශයේ  මහමග දමා ගොස් ඇති බව පරීක්ෂණවලදී අනාවරණය වූ බවද පොලිසිය කියයි.

මුහුදු බඩ දුම්රිය මාර්ගයේ  අම්බලන්ගොඩ කන්දේගොඩ අනාරක්ෂිත දුම්රිය හරස් මාර්ගයද පැන හඬමින් ඉදිරියට පැමිණෙමින් සිටි මෙම සහෝදරියන් දෙදෙනා ප්‍රදේශවාසීන්ට හමුවීමෙන් අනතුරුව ඔවුන්ගෙන් ලැබුණු තොරතුරුවලට අනුව මහමග දමාගිය මේ දැරිවියන් දෙදෙනා සොයා ගැනීමට හැකිවූ බව පොලිසිය කියයි.

මේ දියණියන් දෙදෙනාගෙන් කළ ප්‍රශ්න කිරීමේදී, මාමා කෙනෙකු  සිය නිවසට පැමිණ අම්මා සිටින තැනට එක්ක යනවා යයි කියමින් තමන් දෙදෙනා ඔහුගේ ත්‍රි රෝද රථයට නංවාගෙන ගොස් අතරමග දමා ගිය බව අනාවරණය වූ බවද පොලිසිය පවසයි.

අම්බලන්ගොඩ පොලිසිය මේ පිළිබඳව වැඩිදුර පරීක්ෂණ පවත්වයි.