(රංජිත් රාජපක්ෂ)
 

තලවකැලේ පොලිස් වසමට අයත් තලවකැලේ හොලිරුඩ් රක්ෂිතයේ වන වගා රක්ෂිතයක හටගත් ගින්නකින් එම රක්ෂිතයේ අක්කර පහක පමණ කොටසක් ගිනිගෙන විනාශ වි ඇති බව නුවරඑලිය ආපදා කළමනාකරණ ඒකකයේ සහකාර අධ්‍යක්ෂක රංජිත් අලහකොන් මහතා පැවසීය.

අද (02) දින දහවල් 12 ට පමණ හටගත් ගින්න සිඝ්‍රයෙන් රක්ෂිතය පුරා පැතිර ගිය බවත්, පැතිර ගිය ගින්න එම වතුයායේ පිහිටි වතු කම්කරු නිවාස අසලටම පැතිර ආ බව වතු කම්කරුවෝ කියා සිටිති.

පැතිර යමින් තිබූ ගින්න වතු කම්කරුවන් සහ ප්‍රදේශවාසීන් එක්ව දැඩි පරිශ්‍රමයක් දරා පාලනය කිරිමට සමත් වි ඇත.

මධ්‍යම කදුකරයේ බටහිර බෑවුම් ප්‍රදේශවල මේ දිනවල පවතින අධික වියළි කාලගුණයත් සමඟ කිසියම් පිරිසක් විසින් වන වගා රක්ෂිතයට ගිනි තබන්නට ඇති බව පොලිසිය සැක පළ කරයි.වන වගා රක්ෂිතයට ගිනි තැබිම නිසා එම රක්ෂිතයේ සිට පහලට ගලා බසිනා ස්වභාවික ජල උල්පත් රැසක් ද සිදී යාමේ අවදානමට ලක් වී ඇත.