ග්‍රාම නිලධාරිනියගේ රාජකාරියට බාධා කළ රියැදුරු යළි රිමාන්ඩ්
(සම්පත් ප්‍රියනන්දන සහ නාලක ජේ. හෙට්ටිආරච්චි)
ග්‍රාම නිලධාරිනියකගේ රාජකාරියට බාධාකළ සහ බලපත් රහිතව තේක්ක දැව ප්‍රවාහනය කළැයි කියන සිද්ධියක් සම්බන්ධයෙන් රක්ෂිත බන්ධනාගාර ගතව සිටි ලොරි රථ රියදුරකු සැප්තැම්බර් 26 වැනි දක්වා තවදුරටත් රිමාන්ඩ් භාරයේ තබන ලෙස බලන්ගොඩ මහේස්ත්‍රාත් ජයරුවන් දිසානායක මහතා අද(17) නියෝග කළේය.
බලන්ගොඩ ඇල්ලේපොළ ප්‍රදේශයේ පදිංචි සැකකාර රියැදුරෙකු මෙලෙස රිමාන්ඩ් කෙරිණි.
පසුගිය 02 වැනි දින බලන්ගොඩ පොලිස් බල ප්‍රදේශයට අයත් තලංගම ග්‍රාම සේවා වසම තුළ, බලපත්‍ර නොමැතිව දැව ප්‍රවාහනය කළ ලොරි රථයක් නතර කළ තලංගම ග්‍රාම සේවා නිලධාරිනිය එය පරීක්ෂා කිරීමේදී, එම රියැදුරා ඇයගේ රාජකාරියට බාධා කර ඇත.
මේ සම්බන්ධයෙන් ග්‍රාම නිලධාරිනිය විසින් බලන්ගොඩ පොලිස් ස්ථානයට පැමිණිලි කර තිබිණි. පොලිස් නිලධාරීන් රියදුරුව අත්අඩංගුවට ගෙන අධිකරණයට ඉදිරිපත් කර, අද(17) දක්වා රක්ෂිත බන්ධනාගාර ගත කර තිබුණි.
බලන්ගොඩ පොලිසියේ නුවන්(39448) සහ ආරියසේන (32186) යන නිලධාරීහු සැකකරු අධිකරණයට ඉදිරිපත් කළහ.
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
