(චමිල් රූපසිංහ)

වාර්ෂික ඇසළ මංගල්‍යය පැවැත්වෙන දිනයන් හි දී පවතින ආරක්ෂක තත්ත්වය මත කිසිඳු අයෙක් මහමළුව තුළ රඳවා නොගන්නා බවත් පෙරහර නැරඹීම සඳහා මෙවර දළදා මාලිගාව ඉදිරිපිට මහ මළුව වෙන් නොකරන බවත් දියවඩන නිලමේ ප්‍රදීප් නිලංග දෑල මහතා පැවසීය.

පෙරහැර සංවිධාන කටයුතු පිළිබඳව අද (18) පස්වරුවේ ශ්‍රී දළදා මාලිගාවේ බහු කාර්යය ගොඩනැගිල්ලේ දී පැවති මාධ්‍ය සාකච්ඡාවේදී  දියවඩන නිලමේ ප්‍රදීප් නිලංග දෑල මහතා මේ බව පැවැසීය.

අගෝස්තු මස 2 වන දින අලුයම 5.10 ට යෙදෙන සුබ මොහොතින් උතුරු දිශාභිමුඛව සිව් මහා දේවාලයන්හි කප් සිටුවීම සිදු කිරීමෙන් මෙවර වාර්ෂික ඇසළ පෙරහර මංගල්‍යය ආරම්භ වන බවත් එතැන් සිට අභ්‍යන්තර පෙරහර පහක් සිව්මහා දේවාලයන්හි සිදුවන බවත් අගෝස්තු මස පස්වන දින සිට එම මස නවවන දින දක්වා පුරා දින පහක් කුඹල් පෙරහර වීදි සංචාරය කරන බවත් දියවඩන නිලමේ ප්‍රදීප් නිලංග දෑල මහතා කීය.

අගෝස්තු මස 10 දින සිට 14 වන දින දක්වා රන්දෝලි පෙරහර වීදි සංචාරය කිරීම සිදුවන අතර අගෝස්තු මස 15 වැනි දින අලුයම යෙදෙන සුබ මොහොතින් දිය කැපීමේ මංගල්‍යය සිදු කිරීමෙන් අනතුරුව දහවල් පෙරහර පවත්වා පෙරහැර සාර්ථකව නිමාවට පත්වූ බව සඳහන් සංදේශය දියවඩන නිලමේවරයා විසින් ජනාධිපතිවරයා වෙත නිල වශයෙන් භාර දීමෙන් අනතුරුව මෙවර වාර්ෂික ඇසළ පෙරහර මංගල්‍යය නිමාවට පත්වන බවද ඒ මහතා කීය.

පෙරහර මංගල්‍යය නැරඹීම සඳහා පැමිණෙන සියලුම සැදැහැවතුන්  පරීක්ෂාවට ලක්වන බවත් එහිදී ජනතාවගේ සහයෝගය අවශ්‍ය වන්නේ ඒ සියල්ල සමස්ත ඇසළ පෙරහර මංගල්‍යය සාර්ථක කර ගැනීමට දායක වන නිසා යැයි දියවඩන නිලමේ ප්‍රදීප් නිලංග දෑල මහතා වැඩිදුරටත් ප්‍රකාශ කළේය.