(අජන්ත කුමාර අගලකඩ)

ජල ගාස්තු සියයට 65කින් පමණ ඉහළ දැමීමට ජල සම්පාදන හා නගර සැලසුම් ඇමැති රාවුෆ් හකීම් මහතා කැබිනට් අනුමැතිය ඉල්ලා ඇත.

මේ සඳහා ඇමැතිවරයා විසින් අද (22) පැවැති කැබිනට් රැස්වීමට කැබිනට්  සංදේශයක් ඉදිරිපත් කරනු ලැබ ඇත.

ජල සම්පාදන මණ්ඩලය මුහුණ දී ඇති මූල්‍ය අර්බුදය විසඳීම සඳහා ජල ගාස්තු වැඩි කිරීමට අවසර නොදෙන්නේ නම් තම ඇමැතිධූරය වෙනත් අයෙකුට බාර දෙන්නැයි ඇමැති හකීම් මහතා කැබිනට් රැස්වීමේදී ප්‍රකාශ කළ බව වාර්තාවේ.

ඇමැති හකීම් මහතා විසින් ඉදිරිපත් කරන ලද කැබිනට් සංදේශයට අනුව ජල ගාස්තුව සියයට 65කින් පමණ වැඩි වන අතර ඇතැම් කොට්ඨාස සඳහා සියයට සියයකින් පමණ වැඩිවනු ඇතැයි පැවැසේ.

සමෘද්ධි ලාභීන්ගේ ජල ගාස්තුව වැඩි නොකෙරෙන බවද දැනගන්නට ඇත.ජල ගාස්තුව වැඩි කිරීමේ හකිම් ඇමැතිවරයාගේ යෝජනාවට ඇමැති රිෂාඩ් බදුයුදීන් හා ඇමැති ආචාර්ය සරත් අමුණුගම යන මහත්වරු දැඩි විරෝධය පළකර ඇතැයිද රජයේ ආරංචි මාර්ග සඳහන් කරයි.

එහිදී අදහස් දක්වා ඇති රිෂාඩ් බදුයුදීන් ඇමැතිවරයා ජල සම්පාදන මණ්ඩලය පාඩු ලබන්නේ හකීම් ඇමැතිවරයා 800 දෙනෙකු පමණ ජල සම්පාදන මණ්ඩලයේ රැකියාවලට බඳවාගෙන වැටුප් ගෙවීම නිසා බවට චෝදනා කර ඇත.

ඊට පිළිතුරු දී ඇති ඇමැති හකීම් මහතා ජල ගාස්තුව 2010 සිට වැඩි කර නැති නිසා මණ්ඩලය පාඩු ලබන බව පවසා ඇත.

මේ අතර ජල ගාස්තු වැඩි කිරීමේ යෝජනාවට විරෝධය පළකර ඇති ඇමැති සරත් අමුණුගම මහතා ජීවන වියදම වැඩි වී තිබෙන අවස්ථාවක ජල ගාස්තුද ඉහළ දැමුවහොත් ජීවන වියදම තවදුරටත් ඉහළ යන බව පවසා ඇත.

ඒ සඳහා මේ මොහොතේ ජල ගාස්තු වැඩි කිරීමට එකඟවිය නොහැකි බව ආචාර්ය සරත් අමුණුගම මහතා ප්‍රකාශ කර ඇත.

මේ අතර මහනගර හා බස්නාහිර සංවර්ධන ඇමැති පාඨලී චම්පික රණවක මහතා අදහස් දක්වමින් ජල සම්පාදන මණ්ඩලයේ කළමනාකරණ කටයුතු හා ජලය ලබාදීමේ කටයුතු ද විනිවිදභාවයෙන් සිදුවිය යුතු බව පවසා ඇත.