(ඔගස්ටින් ප්‍රනාන්දු)

කොස්වත්ත පොලිස් වසම තුළ පසුගිය දිනවල ඇතිවූ ගැටුම්කාරී සිද්ධීන්ට සම්බන්ධව ප්‍රශ්න කිරීම සඳහා අත්අඩංගුවට ගෙන සිටි පුද්ගලයින් 31 ක් දෙනා මේ මස 29 වන දින දක්වා රක්ෂිත බන්ධනාගාර ගත කරන ලෙස මාරවිල මහේස්ත්‍රාත් සිරිමෙවන් මහේන්‍ද්‍රරාජ මහතා අද (15) නියෝග කළේය.

පසුගිය දා ඇඳිරි නීතිය පනවා තිබියදී කොස්වත්ත පොලිස් වසමේ කොට්ටරාමුල්ල ප්‍රදේශයේ හට ගත් ගැටුම්වලට සැකකරුවන් සම්බන්ධ බවට ලද තොරතුරු මත  අත්අඩංගුවට ගෙන තිබුණි.

සැකකරුවන් කොස්වත්ත ප්‍රදේශයේ පදිංචිකරුවන් වන අතර ඔවුන් අතර පාසල් සිසුන් සිව්දෙනෙකු සිටින බවත් ඔවුන්ට ඇප ලබා දෙන ලෙස සැකකරුවන් වෙනුවෙන් පෙනි සිටි නිතිඥවරුන් ඉල්ලා සිටියත් දිසා විනිසුරුවරයා එම ඉල්ලීම් ප්‍රතික්ෂේප කළේය.

මෙම ප්‍රදේශයේ සිදුවීම් අතරතුර එක් පුද්ගලයෙකු මිය ගොස් තවත් පුද්ගලයෙක් තුවාල ලබා තිබූ අතර නිවස 6ට හානි සිදුව තිබු බව පොලිසිය කියයි.

සැකකරුවන් අධිකරණය හමුවට ඉදිරිපත් කිරීමට ගෙන ආ අවස්ථාවේ දී සැකකරුවන්ගේ ඥාතීහු අධිකරණ භුමිය අසළට රැස්වී සැකකරුවන් අහිංසකයින් බව කියමින් දැඩි ලෙසින් විරෝධය පළ කර සිටියහ.

මෙම අවස්ථාවේ දී අධිකරණය හා අවට ආරක්ෂාව සඳහා පොලිසිය හා යුද හමුදාව යොදවා තිබුණි.