නවදිල්ලිහිදීය (ඒ.එෆ්.පී)
 
‘පද්මාවත්’ චිත්‍රපටය තිරගත කිරීම නවත්වන්නැයි ඉල්ලමින් රාජස්ථාන හා මධ්‍ය ප්‍රදේශ් කළ අභියාචනය ප්‍රතික්ෂේප කරමින් චිත්‍රපටය තිරගත කිරීමට දුන් තීන්දුව ඒ අයුරින්ම ක්‍රියාත්මක කළ යුතු යැයි ඉන්දීය ශ්‍රේෂ්ඨාධිකරණය අද (23) එම ප්‍රාන්ත දෙකට නියෝග කළේය. 
 
පද්මාවතී යන නමින් තිබූ චිත්‍රපටයේ නම ‘පද්මාවත්’ යනුවෙන් සංශෝධනය කළ අතර චිත්‍රපටයේ රූප රාමු කිහිපයක් ද සංශෝධනය කළේය. ඉන් අනතුරුව චිත්‍රපටය තිරගත කිරීම සඳහා ශ්‍රේෂ්ඨාධිකරණයේ අවසරය හිමිවිය. කෙසේ නමුත් චිත්‍රපටය තිරගත නොකරන බව ඉන්දියාවේ රාජස්ථාන්, මධ්‍ය ප්‍රදේශ් හා හර්යානා ප්‍රාන්ත නිවේදනය කළේය.
 
එල්ල වූ විරෝධය හේතුවෙන් ශ්‍රේෂ්ඨාධිකරණය පසුගිය දෙසැම්බර් මාසයේදී චිත්‍රපටය තිරගත කිරීම තාවකාලිකව නවතා දමන්නැයි නියෝගයක් දුන්නේය. ඉන් අනතුරුව කරන ලද සංශෝධනවලින් පසු බ්‍රහස්පතින්දා (25) සිට චිත්‍රපටය තිරගත කිරීමට ශ්‍රේෂ්ඨාධිකරණයේ අවසරය හිමිවිය.
එහෙත් එම අවසරයෙන් පසු ද චිත්‍රපටය තිරගත නොකරන බව රාජස්ථාන් හා මධ්‍ය ප්‍රදේශ් නිවේදනය කර අතර ඒ සම්බන්ධයෙන් අදාළ ප්‍රාන්ත ආණ්ඩුව ශ්‍රේෂ්ඨාධිකරණයෙන් කරුණු විමසීය. චිත්‍රපටය තිරගත කිරීමේ ප්‍රාන්තවල නීතිය හා සාමය පවත්වාගෙන යෑමට බාධාවක් යැයි ද එම ප්‍රාන්ත ආණ්ඩු ප්‍රකාශ කළේය. 
 
“අපි නියෝගයක් දුන්නා. සියලු දෙනා එම නියෝගයට යටත් විය යුතුයි” ඉන්දීය අගවිනිසුරු දීපක් මිස්රා පැවසීය. “නීතිය හා සාමය පිළිබඳ ගැටලු තිබෙනවා. ඒ නිසා චිත්‍රපටය තිරගත නොකරන්නැයි කීමට කිසිවකුටත් හැකියාවක් නැහැ. ඒ වගේම චිත්‍රපටයට පනවා තිබූ තහනමත් ඉවත් කර තිබෙනවා. ඒ නිසා මේ ආකාරයට චිත්‍රපටය තහනම් කරන්නැයි කියන්න කිසිවකුටත් හැකියාවක් නැහැ” යැයි ද හෙතෙම කීය. 
.
නඩු තීන්දුව දෙමින් අදහස් දැක්වූ ශේෂ්ඨාධිකරණ විනිසුරු ඒ.එම් කාන්විල්කාර් මෙසේ කීය. “මේ ඉල්ලීමේ කිසිදු වලංගුතාවයක් නැහැ. ඔබ පළමුව අපගේ නියෝගය ක්‍රියාත්මක කරන්න. චිත්‍රපටය ප්‍රදර්ශනය කරන්න. යම්කිසි ප්‍රචණ්ඩත්වයක් ඇතිවුණොත් අපි ඉන් පස්සේ කරුණට කරුණ, සිදුවීමට සිදුවීම සලකා බලමු” 
 
පද්මාවත් චිත්‍රපටය බ්‍රහස්පතින්දා (25) සිට තිරගත කිරීමට නියමිතය. රාජස්ථාන් සහ මධ්‍ය ප්‍රදේශ් ඇතුළු ප්‍රාන්ත කිහිපයක සිනමාශාලාවලට පොලස් ආරක්ෂාව සැලසීමට ද බලධාරීන් කටයුතු කර තිබේ.  
 
055