ඉරාන විප්ලවවාදී හමුදාව විසින් සිදුකළ හමුදා අභ්‍යාසයකදී ඉන්දියානු සාගරයට දිගුදුර බැලස්ටික් මිසයිල ප්‍රහාර එල්ල කළ බව එරට රාජ්‍ය මාධ්‍ය වාර්තා කරයි.

ඉරානයේ මධ්‍යම කාන්තාර කලාපයේ සිට එල්ල කරන ලද මෙම මිසයිල, ඕමාන් බොක්ක සහ ඉන්දියන් සාගරයේ උතුරු ප්‍රදේශ ඉලක්ක කර එල්ල කර තිබේ.

මිසයිල වල පරාසය කිලෝමීටර් 1800ක් පමණ වෙයි.

මේ සම්බන්ධව අදහස් දක්වමින් මාණ්ඩලික ප්‍රධානී ජනරාල් මොහොමඩ් බකරි පැවසුවේ, "අපට කිසිඳු ආක්‍රමණශීලී චේතනාවක් නැහැ, දැන් කෙටි කාලයක් තුළ ඕනෑම සතුරු හා ද්වේෂ සහගත ක්‍රියාවකට ප්‍රතිචාර දැක්වීමේ හැකියාව අප සතුව තිබෙනවා." යනුවෙනි.

"අපගේ වැදගත්ම ආරක්ෂක ප්‍රතිපත්ති වලින් එකක් වන්නේ සතුරු ගුවන් යානා සහ යුද නැව්වලට එරෙහිව දිගුදුර බැලස්ටික් මිසයිල භාවිතා කිරීමයි. අපට දැන් සාගරයේ චලනය වන ඉලක්ක වලට පහර දිය හැකිය."
යනුවෙන් රාජ්‍ය මාධ්‍ය උපුටා දක්වමින් ආරක්ෂක හමුදා අණදෙන නිලධාරී මේජර් ජෙනරාල් හොසේන් සලාමි පැවසීය.

ඇමරිකානු ජනපති ඩොනල්ඩ් ට්‍රම්ප්ගේ පාලනය සමග පැවති ආතතීන් පිරිහෙමින් පවතිද්දී මෙම අභ්‍යාස පවත්වන ලද බව නිරීක්ෂකයෝ පවසති.

ඇමරිකා ජනපති විසින් ඉරානයට එරෙහිව 2018 වසරේ සිට දැඩි සම්බාධක පනවා තිබෙන අතර ඉරාන සහ ඇමරිකා හමුදා අතර ගල්ෆ් කළාපයේ වරින් වර ගැටුම් ද පවතී.

කෙසේවුවද ඇමරිකාවේ තේරී පත්වී ඇති ජනාධිපති ජෝ බයිඩන් මහතා පවසා ඇත්තේ ඉරානය නැවත අනුකූලතාවයක් දැක්වුවහොත් ඇමරිකාව න්‍යෂ්ටික ගිවිසුමට නැවත එක්වන බවයි.

(රොයිටර් පුවත් ඇසුරිණි - 085)