(නිමල කොඩිතුවක්කු)

   
ලංකා බැංකුව, මහජන බැංකුව සහ ලංකා ආයෝජන මණ්ඩලයේ අධ්‍යක්ෂ මණ්ඩල විසුරුවා හැරීමට ජනාධිපති මෛත‍්‍රිපාල සිරිසේන මහතා විසින් ගත් තීරණය පිළිබඳ සාකච්ඡා කිරීම සදහා එක්සත් ජාතික පක්ෂයේ නියෝජිත පිරිසක් ජනාධිපතිවරයා මුණ ගැසිමට තීරණය කර තිබේ.


යහපාලන රජයේ එක්සත් ජාතික  පක්ෂය නියෝජනය කරන අමාත්‍යවරු දෙදෙනෙකු යටතේ  ක‍්‍රියාත්මක වන ආයතන තුනක අදාළ අමාත්‍යවරුන් විසින් පත්කරන ලද  අධ්‍යක්ෂ මණ්ඩල ඉවත් කිරීම සම්බන්ධයෙන් මෙහිදී සාකච්ඡා කිරීමට නියමිත බව එක්සත් ජාතික පක්ෂය පවසයි.


ලංකා බැංකුව සහ මහජන බැංකුව අමාත්‍ය ලක්ෂ්මන් කිරිඇල්ල මහතා යටතේ  පවතින ආයතන වන අතර ලංකා ආයෝජන මණ්ඩලය අමාත්‍ය මලික් සමරවික‍්‍රම මහතා යටතේ පවතියි.


ලංකා බැංකුව, මහජන බැංකුව සහ ලංකා ආයෝජන මණ්ඩලයේ අධ්‍යක්ෂ මණ්ඩල ඊයේ (17) මධ්‍යම රාත‍්‍රියේ සිට බලපැවැත්වෙන පරිදි ජනාධිපති මෛත‍්‍රීපාල සිරිසේන මහතා විසින් විසුරුවා හරිනු ලැබීය.